Mapa tulu inyakang saka o ajema jembiang

~ L. Kika Pongener.

Asen Naga nunger dak aketba tashimait mekokmein aika dang lir, saka item ajak rongnung tashimaittibaji “O-bo tulu-lu jembir saka mapabo tilaka dang inyaker” ta asüba ya ka asütsü. Ajisuaka English nunger shin o agibo, “Mapabo tuluka inyaktsü saka o-bo kanga ajema/asoa jembitsüla” ta ashir. Asen Naga nungeri kangasa aginuba olong ka lir aser aji ‘Saheb’ aser Mim-saheb’ ta asüba olong ya kanga anganur aser jadaktsünur. Asen Naga lima nung alir tzüma-longmar aikati asen Naga nunger shisatsü kanga junga metetadoker, aser asen Naga nungerji kechi koda amshi nung parnok tebilemba ajak tonga tajangzük angutsü, item ajakji kanga junga lazüka lir. Tatishitsü agi parnoki oset kar shishilempatsü asoshi asen kidangi arura, ojita nungi mesura kima tongli dang ‘Saheb Saheb’ ta ajatsü aser tebur mali tetsür dang lira ‘Mim-saheb’ ta jaa arutsü aser parnoki bena aliba oset indangji tamajung/tamakitsü oset ka toa tajung/takitarutsü senti oset ka amai nangnanga rasa-a ashitsü. Idangji asen Naga nungba kibursang/kiburla-to ‘Saheb’ o ‘Mim-Saheb’ ta ajaba ola jagi yimsaa oa poa-adoktsü, joka-tua pelasettsü aserbo parnoki bena aliba osetji tajung asü tamajung ? Taila asü chichiba ? (Duplicate or Original) ta kecha mereprangdangtsü aser asen rongdak nungdakba oset asü mesura kangarabo nungdak maliba oset ? ta kecha meshisadangi odang sen makayongjia tangar dang apoer-a odang alitsü. Ashiko asen dang ‘Saheb’ ‘Min-saheb’ ta jaa aruba tzümar-sang pocket nung semoka aliba senji asen kidang kütsü-long nung yua akaba ajunga arokoshia züngdangyongjia iba tzümar-sang pocket nung semoka aliba-jia adoksaa yua makatsü sernung…!!! Saheb o Mim-Saheb ola jagi joka-tua akoseta pelar, takar-tulur amai sayua jenjang kecha mesukshi-i parnoki ayokba osettemji odang agitsü.
Ano asen Naga nunger dak aketba tashimait kaji, memetet sernung meteter amai sayur, tilar ka dang sernung tulur ka amai asüküma jembir, kecha maka sernung kechisarena aka ama lia sayur, aser idangji aiben asen sasa asen timatemer aser lenmang aisu nung maksu aser tetsükdaktsü ajurur. Ajak dak alaka asen Naga nunger dak aketba tashimait tulutiba kaji, takar-tulur ama sayunudang tangar dang sentem/tetemlok (Interest) agi sen apur, aben suoshi pei kibong dak malangba subor, pei kibong dak malangba chiyungtsü chiyunga ajemer, pei jabaso-jala nem takar-tulur chinur kechi aka ajakji jilo benshia alia amshidaktsür/agidaktsür aser idangji tanem tanemi kibong sensak tia-i ayir aser kodanga mesaktettsüsa tzüchi nung asonger. Oboula-otsüla nungeri shin o jembiba o ka, ‘Tar tatsü-pur tar talang den apangtepra tapo kaktettsü’ ta shin o ka lir. Atangji tilari tulur jilo benshira, sensakeri takar jilo benshira pei sasa timtem-ang talila bendenloktsü. English nunger shin o nung ashiba ama, “Tilaka metetbaji lendong” Shirnoki memetet sernung meteter ama asüküma ulua bilemer aser jembir parnok dangji tangari tamashi/tamaji nisung ta ajatsü. Saka shirnoki shia-meteta lir sernung mashi-memetet ama, kaa-ita lir sernung maka-mait ama, tonga lir sernung matong amai asoa/ilaa lia sayur parnok dangji shisa taka nisung ta ajatsü. Asenoki laishiba nung züngdangra, “Tulur ka ama sayur chiyungtsü makaba dang nungi, pei asoshi inyakba tilar kaji tajungba” (A.Shin-12:9). “Nisung kati kecha mekai yur pei sasa takar akümer; tangar kati rongsen tulu yur pei sasa sensaker küma sayur” (A.Shin-13:7). Aji oda, tashitemetetba nunga, shirnok kaket shisatsü shisaliok Degree tulu ngua azüng, parnok jagi kanga tila küma ajemalua tangar akümtsübur.
Ajiser jembishinu yimya aser inyaksangshiba mapa ajak nung tangar ajak den liromedema liteter, saka shirnok mazüng memetet item nisung jagi shinga danga akümtsübu mesayutsü, shinga küpoki malutsü, ajiser pai kechi metet aji alima ajak akok amai ulua bilemtsü aser jembitsü. Atangji tashitemeteter nisungibo koba-teka tashitemetet kümdir patakaji ajemalua tila akümer, kechiyong kodang Degree tulu ngua züngdir idangji alima nung ano asen dang nungi tashitemetetba aika lir ta tali ajemalua tila akümer. Anungji tashitemeteteribo tangar mezüngmeshia o tulu asüküma jembitsü aakseta bilemer, saka mashimalu, langkotem, mazüng-mashiribo tilaka metetbaji alima ajak akok amai tangar dang aakseta mebilemi pai/lai dang ajak tonga metet amai asüküma o tulu jembir. Atangji aiben dang asen ama mazüng-memeteter, mashimalu nisung kati alima lennir yimsusur matsüngdanga numadanga mejembitsü o, masüngdangtsü o pai/lai dang metet amai numadanga asüngdangtsü aser jembitsü, idangji tangar tashitemeteter tulur jagibo temulung nung kanga dang sensa-masaa nemja-luja menutsüa repranger. Tsüngrem o-i ashir, “Kodang asüküm arur idangji maksu arur, saka ajemalur den tashitemetet lir” (A.Shin-11:2). “Temeteteri pei o sotter, tesungjem mulungsen atenerji tangateter nisung” (A.Shin-17:27). Tanü alima tashitemetet putu nung nisunger libaliro awashi yimya nung asen ama tilar kati tulur ka dang tamasa salemdi ta teka mesongloktsür, saka tulur jagi asen dangi arur arung salemdi ta teka songloktsüra asen-ia salemtsü. Benjong-bentsü, lokti senden aser Mongdang-mongchi ajak nung tejaklen alima lennirtem, tongtipang nisungtem(VIP’s) amentsü atema tejaklen wajak nung menden balaka shiteta wazüka yutsür, ajioda iba menden nungji asen ama tilar kati iba mendenji atsünga oa mashi mamentsüla. Tangari ashiyonga mashiyonga asen sasa ni ya shiba ? Ni ya kong/koba tesem nung amentsüla aji asen sasa angatettsü kanga tongtipang. Atangji asenoki mapabo tulu inyaktsü saka o-bo ajema/asoa jembitsü angazükdi.