Mapa tulubo merenemtetter !

Nagaland nung terenlok mapa tulutembo (major projects) aika merenemteti kümsa küm inyakshia amongba aser karbo merenemteti toktsüba timtem aser takoksatem ya khen jungjunga bilemdangtsü nüngdaka kümogo ta Nagaland Foot Hill Road Co-Ordination Committee-i state government dang metetdaktsübaji ken o shitak ka benokogo ta bilemer. Shitakba agi, tang yabo Dimapur nungi Mokokchung, Longleng aser Mon leni aodangbo Assam majangi tenemtsüng lenmang (Foothill road) nung jajaya alitsüba agi, ano tang tashi Doyang ayong apu merenemtet ajokshiba agi nübortem kanga akoksadagi. Tenemtsüng lenmang len ya senzü nungbo tang Assam ajanga senzüba lenmang dang nungi tatsüba asütsü, anungji gari totzü nung sen ajema endoktsü. Ano, kodang Assam majangi gari tulu dena lenmang tajung aser tatsüba nung senzütsüsa kümdir, asen lima nungi len tom nung saru talila magütsüi gari tulu nung süng long dena bener arua Dimapur Railway station tongtettsü. Kodang tenemtsüng lenmang nung gari jajatsü tenzükdir, iba lenmang piyong tesem tesem nung chiyongtsü ayokdak semtu yanglua amenba agi nisung aika peisasa mapa nguteta kibong aika senotsü ajangzüktsü. Foothill ama gari lenmang tulu aser len talang jajatsüsa yanglubaji gari lenmang dangbo masü saka iba amaji nübortem asoshi rongsen poktetdak akümer. Ajisüaka, küm paika nung ya contractor-i iba lenmang merenemtsür, state government-ia kecha balaka temulung agütsüba mangur aser nübortemia mangu amai ola madoki toktsür. Atangji, Nagaland nung nübortem asoshi mapa tulu inyak tenzüker merenemtet toktsübaji Kohima nung NSF Martyrs’ park anasa yanglutur aliba State Cultural Hall-jia ka asütsü. Joko, iba ki yabo kibura mali amato kümogo. Ano, mapa tulu aser tongtibang ka teinyakertem tantsür tambur kümaka mapabo merenemtet amshibaji, Dimapur nung state stadium ya ka asütsü. Iba yabo mapang shitak nung renemka asünunga, joko yanglushitsü mapang tonger lila. Iba ama sentongbo tajung saka mapabo merenemtet sen jenjangang tupet tua amongba ya kechi temulungjang aser tekoloki agizükteta amonger ta bilemer. Iba stadium yanglutsü tenzüker külen asortema joko kibong küma tanur aruogo, ajisüaka asenokbo stadium tilaka ya merenemtet estimate-ang revise süpet süa amongtsüang jangrar asü ta kanga tezüdanga bilemer. Item ama government kiojen tulu yangluba mapatem district shia nung ajokshia angudang tezü atanger. Talangkati maoyonga, kidanger state Assam nung Guwahati yimti kija nung küm shia apu (flyover) talanglang kaka renemba ya koda ? Asenok Doyang apu meter ishika ya kümsa küm ajokshi dang, asen kidangertem state nung apu kilometer ter- metsü renemteta sayubaji asenok asoshibo maksü amaiang ka kümogo. Asenoki lanur asayar tajung adokdaktsütsü bilema stadium yanglu tenzüker merenemtet dang asen sülen küm talangka lir tenzükba stadium nung asayartem joko tangarbo nüngtugu küma asayadagi. Asenok ya kechi ser aser kechi bilemer ? Asenok ya shirnok atema yimsü asür aser shirnok atema alir ? Contract mapa inyakba ya nisung kar senotsü ajangzüktsü asoshi dangbo masü saka state atema tagitsü mapa inyaker. Contract mapa inyakertemi mapa shitak mapang shitak nung renemtsü nung dang nübortem anisüngzüktsü aser state-a topur ajungtsü. Atangji, contract mapa inyakertema tajangzük angutsüla saka mapa inyakba nükjidongji aji dangbo masü. Iba lenmang ya ni yanglu, iba apu ya ni yanglu aser iba ki ya ni yanglu ta tangar danga nümadanga shitettsüsa aser tangartemia ibai shibai yanglu aser inyak ta pelaa reprangtsüsa alima meima contract mapa inyaktsüla, Atangji, asen lima nung mapa ajak nung ‘Commission’ agir onsara kümer südi, iba jagi balaka mapatemji bilemba ama merenemtetter asütsü. Ajisüaka, Nagaland nung inyakba mapa ya jungjunga reprangdangra sen pezü jenjang sen ter agi inyaker, anungji inyaktettsüla. Joko asenoka tajangzük aser ‘Commission’ agir dangbo mesüli saka shitak yimsü südi, mapatem shitak repranga inyakdaktsüdi aser pei tetsü tasoli meima mapa ajak mapang shitak nung renemtsüdi.