Mapai asenok bushir

Nagaland nung mapa teinyaktsübo aika lir ser nung mapa maka amai amajok nung Naga nungertem mapang talangka lia aruogo. Ibaji asen lima nung kaketreju tenzükba mapang kaketshisatsü angazükba nükjidong tai bilemdaktsüba ajanga ajuruba tebilemtsü asütsü. Asenok tsüraburtem arem shirurutem dang nungi jenjang tera agiang temaba nung liasüba jenjang ka nung tzü chigor süoshi agir zülutsü aser azüngtsü angazüktsü tenzük. Iba mapang nungji nisung ajak temezüng agi anaka tekong lu ayimer, zülu metetter kata mali, anungji kodang nisung ka zülu meteta kümdir, pa mesüra laji yakta dang tesayur aküm mesüra government mapa nung ita sen chia tenzükdaktsü. Ibayongji, kaketshisatsü bushiba ya arogo mesüra government kübok ita sen chia alitsü atema bushir amai dang ajaki angatet, anungji ita sen chia alitsüsa mapa mengura pa mesüra lajibo tagidak maka taküm amai tangari dang masü saka peisasa bilemloka tezüdanga adok. Atangji, zünger ita sen chia alitsübaji tajung aser tanüa item mapa bushia inyaktsübaji nüngdaker. Ajisüaka, asenok taküm aliba ya mesüra asenoki kaketshisatsü bushiba nükjidong ya government mesüra arogo nung ita sen chia inyaktsüba atema kisungbo masü, iba dang nungi tesademba aser tajungba mapatem züngashia meteteter asenoksasa asenoki tenzüka inyaktsü wadang jenti lir ta tangbo asenoki angatetter. Atangji, tanüa zünger government mapa rakteper, ibaji shitakbabo government mapa inyakner masü saka ita sen chinür aser ita sen chia alitsü government mapa raktepbaji tanga mapa teinyaktsü maka mesüra memetetba ajanga lir. Ajisüaka, kodang asenoki tanga mapa inyaktsü lenmang ngudir aser meteta kümdir, asenoki government mapa meinyaknütsü.Tanübo akhidang amato masü saka asenoki züsentetba aser yanglutetbatem ayoktsüsa tayokdak lir, anungji government mapa inyakba dang nungibo pei li nung aonsutsü aser süngjanglijang lu ayimba tajungba kümogo. Aji oda, küm aika lir külen masü saka ita ishika tsüngda ongzüka achitsüsa asenoki somomo aser mamazü lu kija ayimnunga asenok takar küma alitsübaji tanü lima ya lir. Tangaleni maoyonga, Dimapur nung somomo, mamazü aser mapu jenjang asüngdang nung asenoki metetadoktsü. Iba denji ano asenoki item chiyongtsütemji mozü mamshii züsentetra, ano itemjibo jenjang tulu aketba chiyongtsütem asütsü. Item luji tilala masü saka khen nung khu abenba gari tulu terjikabo asüngtsüsa asenoki züsentetra, itemjibo ano jenjang tuluka keter tangaleni indangindanga yoktettsü. Itemji dang masü saka tanü asüngbo asen lima nungsa masüyonga tangalen inyaktsü asoshi mapa zünger mezüngma angur. Item mapatemji kar tayimtsü nung, kar hotel tajung tulu nung, kar mozü ki tulu tajung nung ano karbo rong nung ta inyaktsü angur. Item mapatem asoshi asen lima nunga training agütsür. Item mapatem rongnung tayimtsü nung inyaktsü angurtembo tamasayongi ita nung sen meyirijang tenem roker ngua tenzüker aser yamaji tanga mapatem nunga ita sen tajung angur. Itemji dang masü saka peisasa mapa tenzüka inyaktsü asoshi chiyongtsü yangluba, electronic ostettem yanglushiba, tzü pipe aser light wiring yangluba, sü arrba, shiruru metsüa shi aser mamatzü ayokba mapatem zünger mezüngma lir. Iba denji takokertemi government mapa nung tulur mapa inyaktsü agibo, peisasa industry tapu balala lapoka nübortem mapa nung anioktsü aser mozü ki aser kaketreju tajung tululu lapoka yangjia nübortem anioka mapa inyakdaktsütsü mapang tonga aruogo. Nisung kati hotel tajung tuluka lapok nung yangji nisung meyirijang anasemkabo mapa angutsü, yamaji industry anasemka lapoknungbo Naga nunger mapa manguba tebilemtsü masü saka mapa inyaker manguba tebilemtsü agi atongtsü. Itemji bilema asenoksasa asenok kolok aser shisatsü ulushitsüla. Tilartema government mapa tilaka inyakba agi temulung sür malitsüla aser tulur aser takartema bara ki yangluba kija agibo temulung masütsüla. Item dang nungi tajangzük tuluba angutsü aser tajangzük tuluba agütsütettsüsa peisasa mapa tapu balala tenzüka inyaktsüba putuji tanü putu lir.