Mapang lemsar GST kübok petroleum products dendaktsütsü

New Delhi, Chiteni (July) 6 (Agencies): GST Council-i Goods and Services Tax (GST) kübok petroleum products dendaktsütsü bilemdar ta Finance Secretary Hasmukh Adhia-i Hokolbarnü metetdaktü.
Central Board of Indirect Taxes and Customs Chairman S Ramesh-ia kasa onük atema jembidang, “GST kübok petroleum products benoktsü atema takhangba lir, anungji GST Council-i iba atema renemtsüla” ta ashi.
Tang linük nung diesel, petrol, crude oil, natural gas aser aviation turbine fuel GST nung maden aser state temi value added tax agitsü temeten lir.
“Onok dang akhangba onüktem rongnung GST kübok petroleum products benoktsüba ya ka lir. Mapa ajakji mapang telemsa yur ang inyaktsü” ta Adhia-i ashi.
Civil aviation ministry-i mapang shia aviation turbine fuel nung jenjang kanga atuba atema tebilemtsü abenba metetdakja arur, kechiyong iba ajanga tayimtsü senzüba aser taa nung sen aika endoker.
Taoba mapang civil aviation ministry-ia finance ministry dang GST kübok jet fuel dendaktsütsü atema mepishia zülu. Idangji finance ministry-i kobi melii GST kübok natural gas aser ATF dendaktsütsü tebilemba lir ta shia liasü.
“Onoki aika inyakogo aser tang teinyakdak inyakyim tajungba kümdaktsütsü lenmang lir. Ano teinyaktsü aika lir aser onoki iba atemaji inyakdar” ta Adhia-isa shisem.