Mapang tamajungtiba nung India nungitogo: Russia

New Delhi, October 23 (Agencies): India aser Russia na tsüngda US sen billion 12 atema tezüngzüktep agiogo, iba nungji tanabuba nuclear submarine densema lir, iba dak alia Russia-i ano project tali angutsü imlaa, ‘India ya shishilembaba partner ka dangbo masü saka India nunger mapang tamajungtiba nunga partner ka liasü, ta metetdaktsü.
Russia-i India indang P75-I project ajanga sen billion aika tezüngzüktep aginer, aser iba nungji Air Independent Propulsion systems keta aliba conventional submarines trok aser aircraft carrier project den senteper fifth generation fighter aircraft yanglutsü densema lir.
India aser Russia senteper tuluka inyaktettsü, ta shia Russia defense tongti ketdangser kati, US aser Europe linüktemi Russia-i agütsüba maongka magütsütettsü, ta ashi.
700 hi-tech civilian aser military company tem aikati akümba tentet, Rostec State Corporation CEO, Sergei Chemezov-i, “Onoki raraba osettem aser tongtibang weapons tajung agütsütsü mulunga aliba dang masü saka ozü art technology agütsütsü mulunga lir,” ta metetdaktsü.
“Russia ya tembar ka, pusemer ka, aser business partner ka masü. India nunger mapang tamajungtiba tensa nunga Russia-i nungitogo. Sangküm asen tesentaktep küm 70 ajungtsü. Ibaji mapang talangka lir,” ta pai ashi.
“Tawa India nunger nem tenokdangba agüja liasü, iba mapang India partner ji onok dang liasü. Russia ji military supplies partner dang masü saka India nem amshitsü nuclear submarine ka agütsüba densema tongtibang supplies agütsüogo,” ta Russia Tir, Putin den atongsema inyaker, Sergie-i ashi.
“Ibaji bilemdangang, linük kati danga yamaji masütsü. Taoba mapang nunga aser tarutsü nunga yamaji meinyaktsü. US mesüra Europe-i India nem iba ama strategic asset agütsüba ni imdangia marur,” ta paisa shisem.