Mapatem rongnung election duty ya tongtipangba lir: DC Mon

Dimapur, Aenjeti 16 (TYO): Mon nung Aenjeti 15, 2018 nü Aenjeti ita atema District Planning & Development Board (DPDB) senden menogo.
Iba senden ya Deputy Commissioner aser DPDB Vice Chairman, Thavaseelan K (IAS)-i ketdangsüa agi.
Iba senden nung aruya aliba Republic Day anogomung atema renemshia alitsü onüktem jembi.
Iba anogomung atema mapalem sentong ka Aenjeti 16, 2018 nung agiogo.
Mapa ajak dang nungi election duty ya tongtipangba lir, ta shia DC-i Nagaland Legislative Election, 2018 atema mapa inyaka alibatem iba senden nung lemsatep.
Paisa election duty lemzükja alirtem dang iba election takok ngua agitettsü asoshi akok tashi tajungtiba nung pei mapa shidak inyaktsü ajungshi.
Temesepba chiyongtsütem achir atema lapokba Opioid Substitution Therapy (OST) centre atema iba senden nung jembi.
Iba sentong nung NGO aser lokti tentet balala densema inyaktsü aser iba sentong nung taküm liyonga aotsü atema training agütsütsü, ta DC-i ashi.
Executive Engineer, Power, Mon Division, Er. S.I. Asangba Tikhir-ia iba senden nung district nung power tensa aser inyakyim metetdaktsü. Power auya agiba den külemi transmission aser power lemsaba nung takoksa ajuruba indang iba senden nung adenertemi tatsü talang ajunga shisadanga jembi.
DC-isa züngsem ajak dang DPDB senden kata mezüdoki adentsü metetdaktsü aser iba senden nung madener dang tasüngdangba alitsü shisem.