Mapatongji atangji nung shisadangerang latettsüla: Yitachu

Kohima, July 09 (TYO): Tanü Kohima, Capital Convention Center nung National Policy on Education, State Level Consultative senden nung jembidang tongti tesemdanger School Education & SCERT Minister Yitachu-i, nükjidongtem ataloktsü asoshi atangji nung jung-junga shisadanger ang mapatongtemji latettsüla, ta ashi.
Yitachu-i, mapatongtemji atangji nung jungjunga meshisadangra mataloktsü, anungji shisaliok nung linük mapatong tasenba nungi ajak tajangzük angutsü asoshi jila aser yimtsüng nung aliba nüburtem jenjang temelung nung bilema jung-junga shisalemsateptsüla, ta tesentepertem ayongzük.
Human Resource Development Ministry-i ketdangsüa New National Policy on Education achaayangba asoshi pelar aser Kohima nung onük balala nung o lemtepba ajanga mapatong telatetba tajung ka dangi arutsü imlar, ta minister-i ashi.
Ajisüaka linük tesem ajak nung shisaliok mapatong kasabo mesütettsü. Mapatongji tajung asütsüa akok saka tesem balala apir nüngdakjia balala asütsü, ta pai ashi.
Minister-i ashiba agi, takok ngua meinyaktetba mapatong kaji minority scholarship ya lir, iba ya sensaker kaketshirtem nem scholarship agütsütsü nükjidong nung benok, saka iba tajangzük agitsüpur kaketshir aikati iba maongka magitet, kechiyong parnok ket nung bank account lapoka mali aser yimtsüng aika nung bank malibayong iba maongka agitsü asoshi parnoki tenüng magütsü.
Anungji shisaliok nung linük mapatong tasenba nungbo lenla ajaklen shisadangtsü aser Northeast tesem nung nüngdakbatem reprangteta inyakyim tasenbaji latettsüla, ta paisa shisem.
Iba sentong nungsa Nrew Delih NCERT nungi Dr. Sarvari Banerjee-ia, Northeast state temi ajangshiba tebilemtsütemji reprangtsü, ta ashi.
Laisa, o lemtepa mapatongji tatem küma latettsü asoshi onük 33 shima lir aser Nagaland nunga school shisaliok nung onük 11 lemteptsü.
National Policy on Education ya 1968 aser 1986 naprongla nung lateta liasü aser 1992 küm yanglushia liasü aser iba iba mapang nungjagi tenzüka aiben melenshia aruogo.