Mar 11 sülen Shivpal Yadav-i party tasen ka tentettsü

Etawah, January 31 (Agencies) : Taoba Samajwadi Party (SP) state president Shivpal Singh Yadav-i UP elections results adokba sülen pai party tasen ka tentettsü ta Mongulbarnü metetdaktsüogo.
Etawah nung lokti sentong ka nung Mulayam Singh Yadav tenu Shivpal-i ashiba agi, pai SP ticket nung Jaswantnagar menden nungi tokteptsü.
“March 11 nü UP Assembly Elections indang osang metetdaktsüba sülen ni party tasen ka tentettsü” ta tanü pai pa pusemertem dang ashi.
Shivpal-i iba osang sangdongba sülen minute ishika lir külen Chief Minister Akhilesh Yadav-i Etah nung, party tangatetba anema inyakertem merenshitsü, ta metetdaktsü.
Iba ajanga Samajwadi Party nung mangatettep ano metembang lir ta kuli sayur.
Shivpal-i tanü Jaswantnagar Assembly menden atema nomination asü aser pai ashiba agi, “Akhilesh Yadav-i party ticket agütsü, aji mesüra ni Independent ka ama tokteptsüba liasü.”
“Ni pusemertem aikati Independent ka ama toktepdaktsünüa liasü. Iba amaji ka asübo, ni talenba kecha melila” ta paisa shisem.
Paisa temulung masüba SP candidate tem atema nüboyimtsütsü ta ashi.
“Kü tango mesadem tashi ni Netaji (Mulayam Singh Yadav) sülen anidaktsü aser pa nem maaksü bener arutsüba ni maremzüktsü” ta Shivpal-isa shisem.
Samajwadi Party tenzüker Mulayam Singh Yadav-i SP-Congress teloktep malitsüla ta ashibaji shitak ta paisa ashi.
Uttar Pradesh Assembly Elections 2017 atema SP-i 40 ‘star campaigners’ metetdaktsüogo aser iba tarensen nung Shivpal maden.
UP nung taoba PWD Minister Shivpal-i state sorkar nung jenjang tanabuba nung liasü saka Chief Minister Akhilesh Yadav den mangatettep adokba sülen pa iba jenjang nungi atsüngzüka liasü.
Shivpal ya UP nung SP state unit tanishisang liasü saka pa melena Akhilesh pusemer Naresh Uttam shimogo.