Mar 22 nü ‘Janta Curfew’ nung shilem agitsü ayongzüker

Kohima, March 20 (TYO): Nagaland Chief Secretary Temjen Toy-i Deobarnep 7:00 ako nungi aonung 9:00 ako tashi ‘Janta Curfew’ nung shilem agitsü mepishia metetdaktsür, ta tanü Nagaland Chief Secretary Temjen Toy-i ashi.
Prime Minister Narendra Modi-i novel Corona virus (COVID-19) prokshiba noktangtsü aser iba anema rara akangshitsü atema curfew alitsü ayongzükogo aser iba nung Nagaland nung alir ajaki shilem agitsü mepishir, ta Chief Secretary-isa ashi.
R.N Ravi: “Alima nung COVID 19 prokshiba ajanga tebilemtsü khuret tulu ka adokdaktsüogo aser linük kar nungbo takoksa jenti ajurur. Asen linükia iba virus aruogo aser tang tashi Medical Science-i iba tashidak anema mozü meyanglutet ali nung, iba tashidak prokshitsü atema kanga shisabuluteper,” ta Nagaland Governor R.N Ravi-i ashi.
“COVID 19 azüoktsü aser tamakok ngudaktsütsü lenmangji iba tashidak prokshiba noktangtsüba dang lir. Prime Minister Narendra Modi-i tetenzük nungi iba tensa osang metetpelaa arudar. India aser state sorkartemia maparen balala inyakdar aser iba atema WHO-i asen linük nem tenüngsang agütsüogo,” ta RN Ravi-i ashi.
India nung COVID-19 ya Stage-II nung lir aser asenoki iba ya Stage-III mekümdaktsütsüla. Anungji asenoki lokti nung kanga mesenzütsüla aser taruba hopta ishika asenoki kidang dang alitsüla. Anungji, Prime Minister Modi-i ayongzüba Janta Curfew nung asenok ajaki shilem agitsü ayongzüker, ta Nagaland Governor-isa ashi.
“Nagaland nung Covid-19 agi shiranger ka dang puteta mali. Ajisüaka aenoki iba tashidak nungi jenbua alitsüla aser iba atema State Level Task Force den district ajak nung district task force tem tenteta mapa inyakdar. Talisa, Nagaland nung tang nüngdakbatem peria dang lir anungji nübortemi talila alioka ayuba mapa meinyaktsüla” ta RN Ravi-isa shisem.
Y. Patton: “Nagaland sorkari Novel Coronavirus azüoktsü aser noktangtsü atema akokba tashi mapa inyaka arudar. Iba atema teinyaker ajak nem tenüngsang agütsür” ta Dy. CM aser BLP leader Nagaland Y Patton-i sangdong ka nung ashi.
Nagaland sorkari iba dak sendakba nung sangdong balala agütsüogo aser April 12, 2020 tashi kaket reju ajak shibangtsü tetuyuba agütsüogo. Maneni, ILP aser travel permits agütsüba maparen anema lir aser nübortem dang lokti sentong kecha magitsü metetdaktsüogo, ta Y Patton-i ashi.
Nagaland Civil Secretariat nung Chief Secretary-i tangar marutsü tenokdangba ka agütsüogo aser Department aikati kasa tetuyuba agüja lir.
Dimapur Airport nung thermal screening asüba den entry points 14 (Rail & Road) nung screening tenzükogo aser H & FW department-i isolation yipden 171 tashi renema aliba osang angazüker, ta paisa ashi.
Nagaland State sorkarisa COVID -19 atema Special Action Group (SAG) tentetogo aser iba telok ajanga Novel Corona virus anema raraba maparen nung shilem atjung agitsü ta imlar, ta paisa ashi.
“Prime Minister Narendra Modi-i March 22, 2020 anepdang 7:00 ako nungi aonung 9:00 ako tashi ‘Janta Curfew’ alitsü ayongba nung asenoki shilem agitsü ayongzüker” ta Y Patton-isa metetdaktsü.