Mar 24 nungi Meghalaya ajunga shibangtsü

Shillong, March 23 (Agencies): Meghalaya sorkari taruba hopta piyong atema state ajunga shibangtsü ta Hombarnü osang metetdaktsüogo.
Mezüngbuba shibangbaji March 24 aser 25 anogotem asütsü. Iba sülen March 26 nü nübortem shishilembatsü atema lapoktsütsü aser March 27 nungi 29 tashi ano state ajunga shibangtsü, ta sorkari ashi.
Meghalaya Chief Minister, Conrad K Sangma-i Deputy Chief Minister Prestone Tynsong aser sorkar ketdangsertem den senden ka amendang iba telemtetba agia liasü.
Meghalaya-i COVID-19 bener marudaktsütsü atema tang ya tongtipang mapang ka lir aser iba jagi sorkari March 31 tashi shibangtsü telemtetba agi, ta Deputy Chief Minister-i osangbener dang ashi.
“Sorkari nübortem dang iba virus prokshiba azüoktsü atema yariteptsü mepishir” ta Tynsong-isa ashi.
State ajunga shibangaka, state sorkari curfew kecha magütsütsü. Iba ama mapang tamajung ajurudang nisung shiai sorkar den yariteptsüla, ta paisa shisem.
Sorkarisa tang nüngdakbatem ajak peria angutsü atema mapa inyaker. District headquarters aser sub-divisions ajak nung nüngdakbatem peria agütsütsü aser yimtsüng nung alirtemi Shillong-i arutsü nüngdak madoktsü” ta Deputy Chief Minister-isa metetdaktsü.
State ajunga shibangba mapang sorkar office ajak shibangtsü. March 26 nü sorkar mapa inyaker 30% dang office-i arutsü, ta paisa ashi.
Ajisüaka, iba tenokdangba kübok security forces, medical team, pharmacies, essential services like health, electricity, PHE, PWD, police, fire and emergency, food and civil supplies, telecom, telegraph aser banking sector madener, ta Tynsong-isa shisem.