Mar 5 nü ‘job reservation policy’ atema senden amentsü

Kohima, March 3 (TYO): Nagaland sorkari March 5, 2021 nü Kohima nung reservation policy atema senden tongtipang ka ayonga amentsü.

“Cabinet Sub-Committee den Chief Secretary aser Home Department-i sendaktepa alir ajak den senden ka amentsü. Iba senden nung nisungtem pei pei tebilemba metetdaktsütsü imlar” ta CM Rio-i ashi.

“Asenoki inyakyim ka sülen anidaktsüla. Nübortem nem temelenshi angatetdaktsütsü atema policy ka mapa küma meinyakdang asüngdangyatsüla” ta paisa ashi.

Eastern Naga Students Federation (ENSF)-i sorkar mapa nung shilem 45 lemzüktsütsü takhangba agütsür saka iba ya kin hohotem aser Naga Students Federation (NSF)-i anir kaketshir telok aikati magizüker. Iba ajanga state sorkari Nagaland Staff Selection Board (NSSB) maparen sota lir.

Nagaland nung reservation policy tasen ka yanglutsü atema state sorkari Deputy Chief Minister Y Patton-i anir Cabinet Sub-Committee ka tentetogo. Parnoki kin hohotem aser civil society teloktem den tamasa asüngdangyaba sülen ang policy ji renemtsü.

March 5, 2021 nü sendenji anepdang 10-11 ako nung Hotel Japfu Kohima nung amentsü.

Medical College Mon indang kimung atema ashishitepba onük atema CM Rio-isa ashiba agi pai ENPO, Konyak Union aser Mon district nungi MLA tem den osang agitepdar.

“Tebilemtsü onük kar alitsü akok saka iba ya khuret ka masütsüla kechiyong kimung aser tanga onüktem angatetteptsü” ta paisa metetdaktsü.

“Mon jila aser temeket nung ali tajung aika lir aser kimung atema khuret ajurura, temeket nung tesem tajung aika lir,” ta Rio-isa ashi.

February 26, 2021 nü Union Health Minister Dr Harsh Vardhan-i Chief Minister Neiphiu Rio, cabinet minister aser MLA tem lia Medical College Mon yanglutsü atema lung azüngtsü.

Ajisüaka, March 2, 2021 nü Chi aser Goching Village Council temi Medical College Mon yanglutsüba kimung atema ashishitepba metetdaktsüogo.