Maradona-i Pele den külemi shilem agitsü thitsü

Rio de Janeiro, May 31 (Agencies): Taruba hopta Brazil aser Argentina na friendly Australia nung asayaba mapang guest commentator ama Pele den külemi shilem agitsü asoshi asüngdangba Maradona-i magizük.
Brazilian Football Confederation-i tan ita tetenzüklen Argentina nunger football asayar mongin dang ya iba sentong nung shilem agitsü asoshi asüngdanga liasü, ta osang ka ajanga metetdaktsü. BFC puri Brazil nunger friendly match asayabatem sayutsü asoshi temeden agizüka lir.
Aji saka arishi küm 56 tain Maradona-i pa United Arab Emirates club Al-Fujairah nung Coach mapa nung temolung agüja bendanga inyaktsü ta shia iba sentong thitsü, ta osang ajanga metetdaktsü.
Pele aser Maradona na ya alima football asayaba otsü nung football asayar rongnung tajungtiba ana, ta züngshir aser mapang talangka ano tena rongnung shiba tajungtiba ta obangtsükteba arudar. Iba mapang kasa nung tena tsüngda mapang shia kati ka luja arudar.
Pele-i football match 1,363 asayaba nung goal 1,279 agüja otsü yanglua lir aser alima nung asayartem rongnung World Cup asemben abener rongnung pa dang lir.
1986 küm World Cup pa kija akok ama Maradona nem tenüngsang agütsü aser aji dang masü pai Napoli tekübokba jenjang nungi Serie A champion anaben tashi kümdaktsüba indang jembidang pa teti tetshir.
Brazil aser Argentina na Melbourne Cricket Ground nung June 9 nü asayatsü aser anogo 4 lir Brazil puri Australia den asayatsü.