Maradona-i teka agi yokba goal agisang referee den ajurutep

18 August (Agencies): Argentina nunger nüngtugu football asayar tejen Diego Maradona-i 1986 World Cup nung teka agi goal yokba memeteti agisang, referee Ali Bennaceur den Tunisia nung tan hopta oa ajurutepdang, Ali dak azüloka tebang meseper Argentina jersey ka nung pai sign ser agüja liasü.
1986 World Cup, Mexico quarter final nung Argentina 2-1 agi England akokba sülen final tashi tua champion bena liasü.
Iba asaya nung tang arishi küm 54 tain, Maradona-i goal ana yok aser kaji tekolak agi atongtsü atuba metongshii teka agi yokbaji liasü.
Tang arishi küm 71 tain, Bennaceur-i ibaji mangu anungji England nunger asayartemi anema nokdataka iba goal ji agi.
Asaya temer külen Maradona dang iba goal koma sür yok ta asüngdangba mapang pai, iba goal to Tsüngrem kapu agi yok, (Hand of God) ta kanga shisa kaa langzüa liasü.
Iba sülen Maradona dak aikati temulung malentsü tenzük aser karibo pa dang tekülak, taa ajar.
Tan hopta ni Tunisia ao aser refree Ali Bennaceur den kanga menungratepa ajurutep, ta Hombar nü Maradona-i Facebook nung noksa-a ka enokja metetdaktsü.
“Ni pa nem Argentina team-i asemba tula ka agütsü aser pai Argentina o England na 1986 küm quarter final asayadang tangokba noksa par kidang indaka aliba kü nem agütsü,” ta Maradona-i ashi.