Marathwada nung aluyimer 32 soseta asü

Aurangabad, September 08 (Agencies): Tesüiba anogo tenet tsüngda Marathwada region nung aluyimer 32 soseta süogo, aser ibaji densema taküm parnok ajak agi aluyimer 660 tashi süogo. Parnok soseta asüba tongtibang kuli anaji- sentsü aser tsünüsembongtsü nung takoksa tulu aluba lir.

Hingoli dak alaka tanüngba district ajak nung aluyimertem asüba osang lir, ta revenue department ketdanger kati ashi. Taküm aluyimertem soseta asüba timtibaji Beed district nungi 179 liasü. Tanabuba aser tasembuba jenjang nung Osmanabad district nung aluyimer 103 aser Latur district nung aluyimer 64 soseta süogo.

State sorkari tang district asem nungji rangloker, ajisüaka tanüngba district temji-a kasa jenjang nung lir, ta paisa ashi.

Yimti nung nüngtugu psychiatrist, Dr Aziz Ahmed Qadri-i, aluyimertem soseta masütsü atema parnok nem counseling junga agütsütsüla, ta shiogo.

Paisa, aluyimertem aika tejashi ajanga timtemer aser parnok aika treatment agitsü atema par hospital-i aruogo, ta ashi.

World Health Organization aser International Association for Suicide Prevention ajanga September 10 nü World Suicide Prevention Day amungtsü metetdaktsüogo, ta paisa shisem.