Marbaniang-i anir Meghalaya nung Political Party tasen dentet

Shillong, April 02 (Agencies): Meghalaya nung terenlok bener arutsü nükjidong nung, Hokolbarnü regional political party, People’s Democratic Front (PDF) amenlokogo. United Democratic Party (UDP), the Hill State People Democratic Party (HSPDP), the Khun Hynniewtrep National Awakening Movement (KHNAM) aser Garo National Council (GNC) sülen PDF ya Meghalaya nung regional party pongububa asütsü.
“Party-i Election Commission of India den züngsemtsüba sentongtem tembangogo aser tatembangbuba osang dang atadar,” ta PDF tir, Ivanlum Marbaniang- osangbenertem den jembidang ashi.
Paisa ashiba agi, EC guideline nung aliba ama parnoki party atema ‘symbol’ tem agütsüdangtsü, aser nüngdak dang süra party-ia ‘symbol’ tem benokdangtsü.
Marbaniang aser molung ajemba medemer kar senteper PDF party tentet, iba masüdang pa Nationalist Congress Party (NCP) lenir liasü. Par telok 2018 küm election nung tokteptsü.
“Party-i nüburtem taginüba asangsang nung ataloktsütsü asoshi nükjidong lir. State nung aliba resource balala bushiteta tesem ajak nung temelenshi bener arutsü,” ta Party secretary Auspicious L Mawphlang-i ashi.
Mawphlang-i ashiba agi, temelenshi asoshi nüburtemi yongyar, kechiyong aluyimertem, lanurtem aser traditional institution tem renloktsü asoshi sentong anünga lir. Iba tamakok pai tang yimsü tesüdak Congress party dak tongloktsü.
“State nung aliba nüburtem jenjang ajak asoshi tenüngdakba balala dak kongshia ajangzüktsü asoshi sentong tejangja bener arutsü onok nükjidong lir,” ta Mawphlang-isa shisem.