March 10 nü NFHRCC senden menogo

Dimapur, Metsüremi/March 12 (TYO): NFHRCC senden ka March 10 nü menogo. February 11, 2020 nü Chief Engineer PWD(R&B)-i agütsüba shiti dak ajemdaker Foothills Road project dak sendakba nung sensaksemogo. CE-i, EEs PWD(R&B) division ajak dang lenmang yanglutsü asoshi temelaba agütsüba osang agütsütsü aser lenmang metumai aliba indang osang den budget estimates agütsütsü metetdaktsüogo.
Anungji NFHRCC-i, EEs PWD(R&B) ajak dang kuli tejangja bendener ketdangsertem nem osang agütsütsü mepeshia metetdaktsüogo. NFHRCC-isa, Chief Minister Neiphiu Rio aser Deputy Chief Minister Y.Patton dang Doyang nung apu yanglua aliba amala mapa tulu renem ataba mapang foothills road nung gari senzütettsüsa lenmang yanglutsü asoshi fund agütsütsü mepeshia asüngdangogo.
Küm 57 shi Naga nungertem kidanger linük aden senzüsenpongba mapang tepang agi meshitetba timtem tekagshi aika ajangshia arudar, anungji Naga nunger tem ajak ajangzüktsü mechi maksü, timtem aser tangar kübok aliba nungi salatsü asoshi iba mapa ya kechisüdir süaka takaratiba nung tembanga mapa küma inyaksangshitsüla.
NFHRCC-isa, kin balala HOHO tem, department Ralan Area Lotha HOHO den April 17 nü Dimapur nung senden ka amentsü asoshi bangzünga yuogo. Iba senden nung lenmang atutsü asoshi mangatettep aliba bentettsü asoshi sensak asemtsü.
Anungji NFHRCC-i kin balala HOHO tem dang iba sendeni züngsem tanga meyoki ketdangpurtem agua adentsü mepeshia metetdaktsüogo, kechiyong iba project tembanga inyaktsü asoshi iba senden nung tongtibang telemtetba kar agitsü, ta NFHRCC Convenor, Supu Jamir, General Secretary W.Lemba aser AGS ChenithungHumtsoe-i sangdong ka ajanga metetdaktsü.