March 10 nü Polio-National Immunization Day amongtsü

Kohima, Metsüremi/March 09 (TYO): India nung tanga state tem den külemi Nagaland nunga March 10 nü (Amongnü) Polio-National Immunization Day (NID) mezüngbuba round agitsü, ta tanü Directorate of Health & Family Welfare Nagaland: Kohima Mission Director (NHM), Dr. Kevichusa Medikhru-i sangdong ka nung metetdaktsü.
Department of health & family welfare-i state nung polio booth 2274 nung arishi küm 0-5 pur tanur lakh 1.5 nem polio drops agutsütsü maparen renemogo; item polio booths nung health personnel 9096 aser supervisor 445-i yariteptsü.
2011 küm nungi India nung wild polio case mali aser India-i polio anema junga inyaktetba ajanga India densema southeast region-i 2014 küm March ita nung WHO ket nungi certification nguogo.
Alima rangben nung wild polio virus mesamatsü tashibo tanga linüktem nungi India linüki iba tashidak bener arutsüsa lir.
India expert advisory group (IEAG), Polio NIDs-i benokba nung ajemdaker tanur arishi küm 0-5 pur ajak nem OPV agutsür.
Tesüiba mapangtem nung ajaki amalitepa aruba atema pelar, aser maneni department-i nüburtem, agencies (sorkar aser melungtet teloktem, security sepaitem aser police), lokti tentet balala, Arogotem, yimsüsürtem aser tsürabur ajak dang amalitepa March 10 nü item tanurtem nem polio drops agutsütsü ajungshir, ta kasa sangdong nungsa shia lir.
Metetpelatsü atema anasatiba health centre mesüra ner district nung chief medical officer/district Programme Officer (RCH&UIP) den tongteprateptsü mepishir, ta kasa osang ajanga metetdaktsü.