March 12 nü CM menden nungi alutsü: Badal

Lambi (Punjab), March 11 (Agencies): Punjab Assembly election nung takok ngua Congress-i sorkar akumtsü lia Punjab Chief Minister, Parkash Singh Badal-i, pa asüng menden nungi alutsü aser state temeten onüktem dak sentakba nung pai Amarinder Singh nungita yaritsü, ta metetdaktsü.
Badal-i ashiba agi, pai par jabaso- Shiromani Akali Dal Tir, Sukhbir Badal dang election nung tamakok anguba kulitem bushitsü atema committee ka tentetang ta ashitsü.
“Asüng ni Punjab Angh ajurutsü aser menden nungi anenba shidi agutsütsü,” ta Punjab chief minister ponguben tashi inyaksang, Badal-i ashi.
SAD lenir arishi küm 89 tain Badal ya tan state election nung candidate tem rongnung tambutisang liasü aser pai, “nüburtemi obendang agutsübaji ni agizüker aser Punjab nunger temeten atema inyakba nung Amarinder Singh (Congress CM candidate) den yariteptsü ozü party-i melunga lir,” ta metetdaktsü.
Tan election nung SAD-i tamakok anguba dak sentakba nung pai, item kulitemji party core committee senden nung lemteptsü, ta ashi.
“Ni SAD Tir, Sukhbir Singh Badal danga party-i election nung tamakok anguba kulitem bushisüngdangtsü atema committee ka tentetang ta ashitsü,” ta paisa metetdaktsü.
Punjab nung Congress-i sorkar tasen akumtsü.