March 15 nungi Nagaland dena NE nung tzünglu arutsü

Guwahati, March 13 (Agencies): Northeast India nung asükwa tzünglu kanga marui süiogo saka March ita tetenzüklen tzünglu terara aru aser state ajak rongnung Nagaland nung tzünglu teimba aru aser ibaji 200% talila aru, ta Skymet-i March 1 aser 7 tsüngda osang metetdaktsü.
Northeast kübok tesem ajak nung tzünglu shitak dang aru saka Meghalaya nungbo akhi ama maru, ta Skymet-isa ashi.
Tang East Assam tsütsü Anti Cyclone ka lir aser iba ya Bay of Bengal aser Odisha leni aotsü ama ajiteter. March 15 tashi nung Anti Cyclone ka Bay of Bengal kübok tesem kar nunhg adoktsü aser iba ajanga Northeast India nung mopung aontsü.
Iba jagi March 15 nungi Assam, Meghalaya, Arunachal Pradesh, Nagaland, Tripura aser Mizoram nung tzünglu arutsü aser tsüngsak mopung aontsü akok.
Tzüngluji March 17, 18 aser 19 anogo kanga arutsü aser iba anogo asemnü tsüngpret ayatsü aser rü alatsü ana nung dang lir, ta Skymet-isa metetdaktsü.
March 19 nungi tsüngsang mopung tajungba küma tzünglu anentsü aser March nungi northeast state ajaklen tsüngsang tajung asütsü, ta parnokisa ashi.