March 16 nü Captain Amarinder Punjab CM tenangzükba agitsü

Chandigarh, March 12, 2017: Deobarnü Chandigarh Congress Bhavan nung Congress MLA tem senden ka amenba sülen Punjab Congress Tir, Capt. Amrinder Singh, Congress lenir, Harish Chaudhri, taoba mapang Rajasthan Chief Minister, Ashok Gehlot aser Asha Kumari nungeri Raj Bhavan nung Punjab Angh, V P Singh Badnore ajurudang tangokba noksa nung angur.

Chandigarh, March 12 (Agencies): Punjab Assembly election nung Congress-i takok anguba sülen party lenir tain, Captain Amarinder Singh March 16, 2017 nü Punjab Chief Minister menden atema tenangzükba agitsü.
Tanü Punjab Raj Bhawan nung osangbenertem den jembidang pai, pa March 14, 2017 nü Delhi-i oa Congress tatong Tir, Rahul Gandhi ajurutsü, aser sorkar tasen akumtsü atema o lemteptsü, ta metetdaktsü.
Ajisüaka pai cabinet tasen nung minister kwi asütsüar ibajibo memetetdaktsü.
Tanep Amarinder-i state Angh, V P Singh Badnore ajurua sorkar tasen akumtsü atema asüngdanga liasü.
Tanü Party office nung tang tasen shimba party MLA temi Congress Legislature Party (CLP) lenir atema Amarider shim.
Iba senden nung adener MLA tem rongnung Navjot Singh Sidhu (Amritsar East), Pargat Singh (Jalandhar Cantt) aser Raj Kumar Verka (Amritsar East) nungera densema liasü.
Congress-i takok anguba ajanga küm ter SAD-BJP teloktep sorkar atsüngdokogo. Congress-i menden 77 tashi nung takok ngua liasü.
State nung Aam Aadmi Party (AAP)-ia menden 20 angu aser SAD-BJP teloktepi menden 18 dang angu. Tanüngba menden anaji AAP teloktep, Lok Insaf Party (LIP)-i angu.
Assembly menden 117 aliba state nung vote tali timtiba agi takok angusangji, Patiala menden nungi Amarinder liasü. Pai vote tali 52,407 agi AAP candidate, Balbir Singh madak takok angu.
Amritsar West (SC) menden nungi takok angusang, Congress MLA Raj Kumar Verka-i, Congress sorkar atema tongtibangtiba mapaji, state nung temesepba mozü anema inyaktsü, iba tebilemtsü ya SAD-BJP sorkari küm 10 yimsüsüba mapang poktet, ta ashi. “Temesepba mozü shibelenba lenmang anentsütsü atema sentong renema lir,” ta paisa ashi.
Taoba Chief minister Badal-i Congress sorkar tasenba nungittsü ta jembiba dak sendakba nung tasüngdangba ka langzüdang Verka-i, “Party-i Badal teyari menüngdaker, kechiyong parnok ochimashi atema nüburtemi parnok sendokogo,” ta ashi.