March 2019 sülen training magiba tesayurtem mapa nungi anentsütsü

Kohima, August 22 (TYO): March 2019 tashi nungi Nagaland nung training magiba elementary tesayurtem ajak mapa nungi anentsütsü, ta School Education Minister, Tokheho Yepthomi-i tanü ashi.

“March 31, 2019 tashi nung elementary tesayurtem ajak training agitsü atema Union Ministry of Human Resource Development (MHRD)-i tetuyuba ka agütsüogo. Iba ya Parliament-i Right to Education Act nung yanglushiba ajanga lir” ta tanü 2 buba All Nagaland Government School Teachers conference nung Tokheho-i ashi.

March 2019 sülenbo sorkar school aser sorkari teyari agütsüba nija school tem nung untrained teacher mayutsü, ta Education Minister-isa shisem.

“Union MHRD-i tetuyuba agütsüba ama tesayur kari training agitsü memulungra, item tesayurtemji voluntary retirement agi nung tajungba asütsü” ta paisa metetdaktsü.

State sorkari Hindi tesayur 1,379 tashi anioktsü atema mapa inyaker kechiyong taküm April ita Union MHRD-i iba scheme anenogo, ta Tokheho-isa ashi.

School Education Department-i tanurtem tajungtiba kümdaktsütsü atema alizüng yur mapa inyaktsüla. Department indang teinyaktsü aika lir aser asenok külemi longjemer inyak nungdang alizüngtem tonga inyaktettsü, ta paisa shisem.

Sorkar school tem nung HSLC aser HSSLC tatidangtem indang result majung liasü saka iba ya school aika nung Science aser Mathematics tesayur maliba ajanga lir. Kobi melii science aser mathematics tesayurtem agütsütsü.

Mezüngbuba All Nagaland Government School Teachers Conference alidang tesayurtemi tenangzükba agiba bilemteta tesayurtemi bendanga mapa inyaktsü ayongzüker. Anogo ka mesüra ita ka tsüngda temelenshi bener marutettsü, saka asenok külemi longjemer merangra, tanü asenoki ajurua aliba khurettem koktettsü, ta Tokheho-isa ayongzük.

Paisa, tesayurtem, school education board aser village council temi proxy tesayur mayutsü atema tezüluba nung sign süa ayutsüla, ta ashi.

“Tesayurtemji ministerial staff ama inyaktsü atema masü saka tanurtem dang sayutsü atema shimba lir” ta paisa shisem.

Nagaland nung department ajak nung ama ketdangser aser mapa inyakertemi Dimapur aser Kohima nungdang mapa inyaka anisüngzüknür. Iba tangatetba ya melenshitsüla, kechiyong asen linük nung senso ajak temeten kasa indang shia lir, ta Tokheho-isa metetdaktsü.

Iba sentong nung mendenji Principal Secretary SCERT & School Education F P Solo liasü aser SCERT Director Khrietuo Mezhür-i okila jembi.

Anogo ananü All Nagaland Government School Teachers Conference ya SCERT Nagaland-i ayongzüka amunger aser asüng nikongdang tembangtsü.