March 21 nü Kejriwal okadaki jaokogo

New Delhi, February 18 (Agencies): Honibarnü Aam Aadmi Party (AAP) tongti lenir aser Delhi Chief minister, Arvind Kejriwal dang March 21 nü Delhi court ka matsüngdangi arutsü jaokogo.
DDCA aser Chetan Chauhan-i tenüng menüktsüba ken o ka Arvind Kejriwal anema benoka lir.
Tamalen Kejriwal-i, pa temang anepalutsü atema Bengaluru-i oa lir aser February 22 nü ang meyipa arutsü ta mepishiba nung ajemdaker Metropolitan magistrate, Abhilash Malhotra-i pa temepishibaji agizüka liasü.
Kejriwal-i, pa court matsüngdangi marubaji asa-a masü mesüra metetsümonga marur masü, ta temepishiba shidi nungji shia liasü.
Kasa ken o nung BJP MP nungi anenja alisang, Kirti Azad bo sen 10,000 agütsür bail nung chiokogo.
Tenati jembiba oji ajanga Cricket tentet, DDCA aser ketdangsertem tenüng menüktsür ta mezüng bushisüngdangba ajanga bushitetogo ta shia January 30 nü court jagi Kejriwal aser Azad na jaoka liasü.
“News channel ka den interview agidang Kejriwal-i, senotsü nung ochimashiba dak alia teküp ayokba densema DDCA nung aibelen mapa aika lir ta jembi,” ta pa anema ken o benokba nungji shia lir.
Court-isa, iba oji news channel ajanga prokba dang masü saka National osangkakettem aser Internet nunga prokshiogo, ta ashi.