March 24 ayaterm nungi India nung passenger tayimtsü mesenzütsü

New Delhi, March 23 (Agencies): Coronavirus (COVID-19) tashidak nokdangtsü atema India-i March 24, 2020 ayaterm nungi tenzüka linük nung senzüba passenger tayimtsü ajak anentsü, ta sorkar osang ka ajanga metetdaktsü.
Central osang ka ajanga, March 24 aonung 11:59 ako nungi linük nung senzüba commercial airlines ajak anentsü, ta metetdaktsü.
Linük nung senzüba airlines operators ajak dang March 24 aonung 11:59 ako tashi nungbo tayimtsütem tatongtsü tesem tonger alitsüsa sentong yangluang, ta sorkari metetdaktsü.
Ajisüaka khu abenba tayimtsütembo maneni senzütsü melatsü.
March 22 nü Indian Railways-ia March 31 tashi passenger train ajak anenogo. Item train rongnung meta talang senzüba Mail/Express aser inter-city trains densema lir.
Hombar nikongdang tashi nung India nung nisung 433 dak coronavirus tashidak putetogo aser nisung tenet süogo.
Hombarnü Union Health Ministry-i sangdong ka ajanga, India nung nisung 433 dak coronavirus putetogo; parnok rongnung tang teshirangdak nisung 402 lir, nisung 24 bo anepogo aser nisung tenet süogo, ta metetdaktsü.
Tang tashi nung nisung 433 dak iba tashidak putetogo aser parnok rongnung bendanger 40 densema lir, ta Ministry-isa metetdaktsü.
Yashi (Amongnü) Gujarat, Bihar aser Maharashtra state shia nungi nisung kaka asü aser tamalen Karnataka, Delhi, Maharashtra aser Punjab shia nungia nisung kaka süogo.
March 23, 2020 anogo tashi nung alima nung nisung 353,447 dak iba tashidak putetogo, nisung 15,415 süogo aser nisung 100,616 bo taneptsü nguogo.