March 25 nü Dimapur nung Clean Election seminar akatsü

Dimapur, March 22 (TYO): Dimapur Urban Council Chairmen Federation (DUCCF) aser ACAUT Nagaland senteper March 25 nikongdang 2:00 ako nung Sakus Mission College auditorium hall, Landmark colony (PWD), Dimapur nung Clean Election seminar ka ayongzüka akatsü, ta Information & Publicity Secy., DUCCF-i sangdong ka ajanga metetdaktsü.
Iba sentong nung tongti o jembirtemji NBCC Clean Election Committee nungi züngsem ka aser Wb. Khekiye K. Sema IAS asütsü, iba den külemi Dreamz Unlimited, Nagaland-i shilem tajung ka agitsü.
Iba seminar ya NBCC clean election mapatong nungita ayongzüker, koba ajanga kin tabensa ajak aliba, Dimapur nüburtemi temelungtetba tulu agi election merüka agitsü atema inyaka temelenshi tulu bener aruba ajanga tanga municipal aser jilatemia tatishitsü tajung agitsü imlar, ta DUCCF-i ashi.
ULB aser general elections nung Municipal Area wards/colony tem nung tim masübatem benshir aser tatem nungbo pei colony tem dang tim atemer. Anungji jila nung alirtem rajema lidaktsütsüji tongtibang, ibaji ajanga parnoki pei jila aser yimtsüngtem nunga kinungertem nem iba indang rajemdaktsütettsü.
DUCCF kübok peipei kiyong nung clean election atema NBCC tenangzükba agitsü, aser iba atemaji Dimapur Baptist Pastors’ Fellowship (DBPF)-i iba sentong anitsü aser sarasademtsütsü melungogo.
Iba dak alia election merüka agitsü aser ochimashi maliba lokti ka yangertsü atema Dimapur district nung aliba kaketshir tentettem, lanur tentettem, kin tentettem, melungtet teloktem aser lokti tenettema iba seminar nung dena tenangzükba agitsü ayongzüker, ta sangdong nung shia lir.
Maneni Dimapur Municipal area kübok colony ajaki jaokba züngsem abensaa arutsü mepishia metetdaktsür, ta kasa sangdong nung shia lir.