March 30 nungi PM Modi-i linük 3 semdangtsü

New Delhi, March 22 (Agencies): March 30 nü nungi tenzüka Ato kilonser, Narendra Modi-i linük asem semdangtsü, aser iba mapang Brusells, Belgium nung pa 13buba India-EU Summit nung adentsü aser Washington (US) nung Nuclear Security Summit (NSS) senden nung adentsü.

New Delhi nung osangbenertem den jembidang External Affairs Ministry otongdar, Vikas Swarup-i, “European Council Tir, Donald Tusk aser European Commission Tir, Jean-Claude Juncker nati jaokba nung ajemdaker Ato kilonser 13buba India-EU Summit nung adentsü atema pai tang mezüng March 30, 2016 nü Brussels semdangtsü,” ta metetdaktsü.

“European Union (EU) ya India’er shishilembaba aser investment partner tulutiba lir aser export destination tulutiba lir,” ta paisa ashi.

“2004 küm nungi India aser EU na ya strategic partners lir. 13buba India-EU Summit nükjidongji- India-EU strategic partnership tajungba akumtsü aser India ainba den renloktsü atema tongtibang onüktem nung senteper inyaktsü atema lir,” ta MEA otongdar, Swarup-isa metetdaktsü.

Swarup-i ashiba agi, Belgian Ato kilonser, Charles Michel-i jaokba nung ajemdaker Modi-i Belgium den linük ana tsüngda tesentakatep atema o lemtep senden nung adentsü.

India aser Belgium na tesentaktep junga lir ta shia pai, “EU nung Belgium ya India’er shishilembaba partner tanabuba jenjang nung lir. Ato kilonser ana tsüngda senden amenba ajanga rongsenkettsüng partnership tajungba akumtsü,” ta ashi.

Brussels nungi Modi Washington D.C., US-i oa March 31 aser April 1 nü 4buba Nuclear Security Summit nung adentsü.

“2016 senden nung linük 52 aser International tentet 4 arua adentsü imlar,” ta Swarup-i ashi.

Maneni Modi-i April 2 aser 3 nü Saudi Arabia semdangtsü, iba mapang nung pai Chuba, King Salman Bin Abdulaziz Al-Saud ajurua senden amentsü.

Tang Saudi Arabia nung India nunger million 2.96 shi lir aser parnok teimba ka aayangertem lir.