March 5 nü Bharat Bandh ayongzüker

Guwahati, March 3 (Agencies): India kübok state balala nung lisopurtemi March 5 nü Bharat Bandh alitsü ayongzüker.
Supreme Court-i tawa tetuyuba ka agütsüba ajanga lisopur aser arem-min nung alirtem aika pei talidak toktsür aotsüsa akümtsü ta tsübuba agi iba mokdang alitsü ayongzüker.
Lisopurtem aliba Gujarat, Rajasthan, West Bengal, Jharkhand, Chhattisgarh, Madhya Pradesh aser Northeast kübok state tem nung mokdang sentong agitsü ta osang ajanga ashi.
Supreme Court-i tetuyuba agütsüba ajanga lisopur lakh 10 dak tema pei talidak toktsütsüsa akümtsü ta lungkak aitertemi ashir.
Forest Rights Act nung lateta aliba ama sorkari lisopur temetentem kümzüka ayutsü atema ordinance ka yangluang ta lisopurtemi takhangba agütsütsü.
Onoki akhangba ama telangzüba agütsü nung dang March 5 nü mokdang ayongba athitsü, ta Dalit & tribal activist Ashok Bharti-i ashi.
February 13, 2019 nü Supreme Court-i India kübok state 16 nung arem-min nung alir lisopur lakh 10 dak tema meindoktsü atema tetuyuba ka agütsü.
Iba ajanga Assam nunga arem-min nung alir nisung 27,000 dak tema kongshitsü.