March ita sülena nisung aikati Reliance Jio amshitsü

New Delhi, January 07 (Agencies): Nüburtemi Reliance Jio kanga sapua kümogo. Bank of America Merrill Lynch (BofA-ML) ajanga bushitetba agi, March 31 nung angati amshitetba sentong tembangaka, Reliance Jio amshir shilem 85-i maneni iba network amshitsü akok.
Jio nung Happy New Year Offer ajanga iba network amshirtemi 4G data aser voice call angati amshitsü asoshi 2016 December 4 nungi 2017 March 31 tashi atsülangja lir.
BofA-ML ajanga bushitetba kar:
Reliance Jio amshir noklang nung shilem 67-i secondary SIM ama amshitsü aser shilem 18-i iba primary SIM ama amshitsü.
Shilem 57-i sen 400-500 mapayui intoka iba network tang aliba sentong ama amshitsü.
Parnoki asüngdangba mapang, shilem 24-i Jio ya mamshidang, ta bushitet aser ibaji Jio SIM amshitettsüsa handset maliba ajanga aser iba SIM alitsü asoshi mapang talanglang menoktaknüba ajanga lir.
Iba survey ajanga ashiba agi network balala amshir rongnung Bharat Airtel amshirtem temolung süa amshibaji noklang nung shilem 97.7 lir aser telecom company tilatem amshirtem shilem 89 lir.
Bharat Airtel amshir noklang nung shilem 17-i Jio ya primary SIM amshisü bilemer saka tanga telecom amshirtem shilem 41-i Jio ya primary SIM ama amshitsü jangrar. Reliance Communication ama telecom tilatem ya secondary SIM ama amshir aser parnoki Jio ang amshitsü akok, ta BofA-ML ajanga bushiteta lir.