Marcus Rashford-i otsü tasen yanglur

Sunderland, May 28 (Agencies): Australia telok madak goal 2-1 agi takok ngua asayaba friendly asaya nung Manchester United striker, Marcus Rashford-i otsü tasen ka yashi, Hokolbar nü yangluogo.
Arishi küm 18 tain Rashford-i yashi asaya tenzüker second 138 nung par England telok asoshi mezüngbuba goal agüja England tenüng nung mezüngsüa asayar rong nung tekaratiba mapang nung goal agütsür asayar küma otsü yanglua liasü.
Tan otsüsütsüsüa shilem agiba ajanga Rashford-i England tenüng nung Euro 2016 asayamong nunga shilem agitsü asoshi shimba asayar rong nung densemtsü maongka angutsüsa jenjang tajung angur lir.
Tan agi professinal (Pro) asaya 19 buba nung shilem agisang, Rashford-i Manchester telok tenüng nung mezüngüsa taküm February ita asayadanga goal ka agüja liasü.
Rashford-i yashi goal agütsüba sülen külem asayar, Wayne Rooney-i par England tenüng nung goal 52 buba agütsür küma, yashi tanabuba aser takokba goal agüja par England nem takok ngudaktsü.
Tesülen, par substitute asayar, Eric Dier-ia par goalpost telungi pa tekolak agi ball tongokja goal agütsüba ajanga Australia telokia yashi asaya nung goal 1 agütsü ta züngoktsüsa aküm.