Marepkong B/A Youth Ministry pur saisapong benjong akar

Artang Baptist Arogo Youth Evangelist, Asenla-i Marepkong Baptist Arogo Youth Ministry saisapongmung lapoktsüdang tangokba noksa nung angur. Mokokchung, 21st April, 2017.

Mokokchung, April 21 (TYO): Marepkong Baptist Arogo Youth Ministry-i ayongzüka saisapong benjong sentong ka “Khristaji asen referee” omen nung ajemdaker Marepkong play ground nung kadaki. Iba sentong nung Artang Baptist Arogo Mokokchung nungia youth ministry nungi lanurtem jaoka külemi shilem agia mungdaki.
Artang Baptist Arogo Youth Evangelist, Kr. Asenlai iba saisapongmung lapokja jembidang, asenok meimchir taküm ya asayar kaka amai lir, anungji, Laishibaji asaya ozüng ka ama südaktsür külen Khrista-ji asen referee ama akhümtsübua aser kechisarena nung azüoka alitsü asoshi tayongzükba ka agütsü.
Telok asem küma lemsar tetoktepba balala kadaki. Mezüng nü local formula, lightning reflection, rope hurdle, bamboo climbing, caterpillar race, frog relay race, snake tail, tunnel race, balloon bursting, men Vs food nungertem asaya mungogo. Iba sentong ya April 22 tashi asaya tapu balala asayaa amungtsü.
Iba ama arogo ana nungi lanurtem lungjemer shilem agiba ya jangratemtsü aser iba ajanga adianutem tsüngda kati ka metetteper, aser Khrista sentsüwangshidaktsüba den telungjem adokdaktsür, ta shilem agir kati iba osangbener den jembidang ashi.