Marepkong Youth Ministry pur saisapong benjong akar

Marepkong Youth Ministry-i ayongba saisapong benjung sentong nung shilem agirtemi Super Mono Grand Prix (GP) ta ajaba süng agi yangluba gari tetoktepba ka agitsü renemshidang agiba noksa ka yangi angur. (Mokokchung, April 22)

Mokokchung, April 22 (TYO): Marepkong Baptist Arogo kübok Youth Ministry-i ayonger külen Marepkong nung ‘Sports Festival’ ta ajaba saisapong sentong ka tanü, Hokolbar nü nungi tenzüka agitsü tenzükogo.
Mopungchuket Baptist Arogo nung tezülur, Temjen Aier-i tanü saisapong sentongji tenzükja liasü.
“Asayadak asemteper ajakibo takokba mangur,” ta shia, Temjen-i Laishiba tesayuba nung ajemdaker tanü tayongzükba kar agütsü.
“Tsüngremi asenok nisung shia nem sempet balala agüja lir. Anungji, nisung shiai pei nem agütsüba sempet tajungtiba yimya nung amshiba ajanga Tsüngrem sentsüwangshidaktsütsü,” ta shia, pai lanurtem ajungshi.
Tan sentong nung shilem agirtemi Super Mono Grand Prix (GP), Lightening Reflect, Dendrite vs Fevicol, Caterpillar Race, Frog Relay Race, Snake Race, Relay Race, Snake Tail, Tunnel Race, Volleyball, Say It, Amazing Grace, Kite Making, Seven Precious Stone, Mantis Race, Human Yarn Windle, Sack Race, Balloon Relay Race aser Tug-of-War nunger asayatem toktepa asayatsü tenzüka lir.
Tan Honibar nü tembangtsü renemba saisapong sentong nung Rolex, Titan aser Fast Track telok 3-i shilem tagidak lir.
Tanü sentong nung Ungma Baptist Arogo kübok Youth Ministry nungi lanurtemia arua shilem agiba ajanga sentongji tali meraketdakja liasü.