Maria Sharapova-i China Open nung asayatsü

Paris, August 7 (Agencies): Maria Sharapova-i Beijing nung asayatsü aliba China Open nung shilem agitsü mulunga agizükogo.
Lai iba asayamung nung tang agi tenetbenbuba shilem agitsü. Punguben tashi Grand Slam champion Sharapova tepi nung timtem ka aliba ajanga taküm Wimbledon aser grasscourt season nung shilem magiteti aru.
Taoba hopta tu lai Stanford nung asayatsüba liasü saka idangji la teka manemba ajanga masayatet toktsü.
Russia tsür Sharapova-i meldonium ta asüba mozü amshiba atema ita 15 masayatsü tenokdangba agütsü. Iba mozü ya ketdangsertemi nokdanga lir.
Ita 15 tenokdangba agienba sülen taküm April nungia lai asayamung nung shilem agir aser tang tashi nung lai asayamung pezü nungdang shilem agiogo.
“Taküm October ita ni Beijing-i arur China Open nung shilem agitsü atema kanga pelar. Iba ya ni atema jangratemtsü osang ka lir kechiyong taküm asoshi Asia nung ni iba asayamung nung mezüng shilem agir asütsü” ta Maria Sharapova-i ashi.
Taküm September 24 nungi October 8 tashi asayatsü aliba China Open nung Wimbledon champion Garbine Muguruza, Caroline Wozniacki, Venus Williams aser China asayartem- Zhang Shuai o Peng Shuai nungertem asayatsü sentong lir.