Mariah Carey nem Hollywood Walk Of Fame Star agütsüogo

August 06, 2015: Grammy Award angur kentener Mariah Carey nem Hollywood Walk Of Fame Star ka agütsüogo, aser lai taruba season ‘Empire’ nunga shilem tila ka agitsü, ta osang ka ajanga metetdaktsü.
Bodhbar anepdang (August 05, 2015) Hollywood Boulevard aser Argyle Avenue nung star 2,556 buba sayaba mapang la den lar jakrep chir arishi küm pezü Moroccan aser Monroe na densema liasü.
Fox atema ‘Empire’ co-creator, director aser producer aser 2009 küm Precious film nung Carey direct asüsang Lee Daniels-i, Carey-i taruba ‘Empire’ nung shilem tila ka agitsü ta metetdakja liasü.
“Lai ‘Empire’ nung shilem agiba reprangang!” ta pai ashi.
Ano Mariah’er record label boss, Epic, CEO L.A. Reid-ia, ‘Fantasy’, ‘Heartbreaker’ aser ‘Dreamlover’ kentem tetshia, “La ya kija kentener ka lir, aser lai alima tesem ajak nung nüburtem ajungmesoogo. Küna tasoba anogoji, anogo ka dang tepila lir. Ni la ya aianu ka ama züngshir,” ta ashi.
Tanü Mariah nem star agütsüba sentong nung lar jakrep chir Moroccan aser Monroe nati la dang nungi microphone rakzüka, “Oja ni na meimer” ta shia liasü.
Iba sentong nung Mariah-ia, “Ozü chir ana ano sabangi atua mejembidangyongi ni tekaraba nung jembidi,” ta asayamenüa ashi.
Laisa, “Yagi aruba asoshi ajak dang kangasa pelar. Nenoki ni jepdaktsür. Iba ya tetushi tulu ka lir aser kü lanuwa nükjidong ka ataloker lir,” ta ashi.
Arishi küm 45 kentener Mariah-i US nung number one singles 18 nguteta lir, aser ibaji US nung shingaia tongteta mali. Tang la telitak, Las Vegas nung lai shilem agia arudagi.
Lai US chart nung number one singles 18 nguteta aliba ken rongnung ‘Vision Of Love’, ‘Love Takes Time’, ‘Someday’, ‘I Don’t Wanna Cry’, ‘Emotions’, ‘Hero’, ‘Honey’, ‘My All’, ‘We Belong Together’ aser ‘Don’t Forget About Us’ densema lir.