Marion Cotillard-i Brad-Angelina indang jembiogo

September 22 (Agencies): France tsür actress, Marion Cotillard ya Brad Pitt den medema tesentaktep lir ta olulu jembiba aser Angelina Jolie-i Brad den balatsü benokba sülen lai Instagram ajanga iba atema jembiogo.
Arishi küm 50 actress, Cottilard-i Instagram ajanga osang talangka metetdaktsü, ta  Bodhbarnü Daily Mail osang ajanga ashi.
Academy Award angur Cottilard-i, la tanaben mashisa lir, ta metetdaktsüba den külemi iba ama mapang ka nung Brad Pitt aser Angelina Jolie na nem tesünep agüjang, ta ashi.
WWII film ‘Allied’ tangokdang Brad aser Cottilard na meimtep ta osang prokba sülen ‘The Dark Knight Rises’ actress Cottilard-i Instagram ajanga, “Ghonda 24 jakdang mopung nung prokshiba osangtem sülen tang ni mezüng jembir asütsü. Ni mashimashi nung mejembir mesüra süoki ia magir. Ajisüaka iba tensa ya alonger asünung, aser ni meimba nisungtem kongshir asünungji ni jembitsüsa akumer,” ta ashi.
Laisa, “Tamasa, küm aika tejaklen ni kü taküm nung ni asoshi tebursang ajuru, ozü jabaso tebu aser onoki asotsü yongyaa ataba chir. Paji kü meimsang, kü tembar tajungtiba, ni nüngdakba tebur ka. Tanabuba nung, ni jashia alir ta jembirtem dang, ni kanga junga lir, kanga pelar ta ashir. Aser media o tesempartem shirnoki kerara obendang agütsür parnok dang ya ashir, nenok tekeraba nung taneptsü angutsü ni bilemtsür,” ta ashi.
Maneni laisa, “Tatemsa, ni kanga dang akhümtsübua aliba Angelina aser Brad naprong dang, iba ama mapang ka nung nenapronglai tesünep ngudakjang ta ni bilemtsür,” ta ashi.
Tangatetba balala aliba aser kibong dak ajemdaker September 19, 2016 nü Jolie-i la kinungbu den balatsü atema ken o agütsüogo.