Mark Ruffalo project tasen ka nung shilem agitsü

Yimpoksüi/November 09 (Agencies): Director Todd Haynes-i ‘DuPont chemical pollution’ aibelenba otsüren nung ajemdaker yanglutsü aliba film nung nüngtugu actor Mark Ruffalo-i tongti shilem agitsü ternemba lir.
Arishi küm 50 tain Mark shibai Avenger installment film ajak nung Bruce Banner (Hulk) shilem agiogo, pai taruba project nung corporate defence attorney, Robert Bilott shilem agitsü. Robert ya Nathaniel Rich-i züluba New York Times Magazine indang article ‘The Lawyer Who Became DuPont’s Worst Nightmare’ nung adoka liasü. Iba article nung company-i küm aika ‘environmental pollution’ meimbanga aliba jungai adoktsür, aser iba tensa indang nung ajemdaker film yanglutsü.
DuPont-i aibenlenba maparen ya 2016 küm ataloka liasü, kong iba tesem nung alirtem, idakji inyakertem aser lawyer temi company indang asalentong maparen nung ashishiteper aser iba company nungi adokba product aser Teflon nung C8 chemical densema alima parnoki puteter.
‘Testicular cancer’ tashidak densema, iba ‘chemical waste’ ajanga tashidak trok den sendaktepa aliba tendangtetta liasü. Ajisüaka, chemical waste ji West Virginia tesem kübok tzü lenmang nung indoker.
‘House of Lies’ film yanglusang aser producer Matthew Carnahan-i iba blockbuster film atema screenplay zülutsüogo aser film nung Matthew den longjema Pamela Koffler aser Christine Vachon nati produce asütsü.
Tang Mark Ruffalo-i ‘Avengers’ franchise indang installment pezübuba nung mazüngi inyakdar. Kasa mapang Mark-isa HBO indang series tasen ka nung jakrep adokba indang shilem tagidak lir.
Tanga project tsütsü reprangdangra, ‘I Know This Much Is True’ programme shilem trok buba nung Mark-i executive producer ka ama inyakdar.
Mark, shibai Ryan Murphy indang HBO movie ‘The Normal Heart’ nung shilem agiba atema award ngua liasü, pai, “@HBO team again! Den tanaben longjema inyakba atema pelar aser iba otsü nenok dang sayutsü atema kanga dang yongyar,” ta Twitter ajanga lemsatep.