Mark Wahlberg-i Michelle Williams tenüng nung sen million $1 tenla agütsü

Aenjeti 16, 2018 (Agencies): Actor Mark Wahlberg-i ‘All the Money in the World’ co-star Michelle Williams tenüng nung Time’s Up Legal Defence Fund nem tenla sen million $ 1.5 agütsü. Iba film tangokshiba nung taa agütsüba dak sendakba nung tetsür aser tebur na tsüngda tebendang aliba dak sendakba nung taitsüba ajangshiba sülen Wahlberg-i iba tenla ya agütsü. Iba film yanglushiba atema Wahlberg nem sen million $1.5 agütsü saka kasa mapang nung Williams nem anogoshia taa $1,000, nungi $80 shi dang agütsü, ta osang ka ajanga metetdaktsü.
“Anogo eshika ‘All the Money in the World’ film tangokshiba nung kü nem taa agütsüba ya kanga dang tongtibang onük ka küma jembidar. Ni atsü apong mebendangi taa agütsütsüba atema raraba ya pusemer aser iba dak sendakba nung ni Time’s Up Legal Defence Fund nem Michelle Williams tenüng nung sen million $1.5 tenla agütsütsü,” ta Wahlberg-i ashi.
Talent agency, William Morris Endeavor Entertainment (WME) puri Wahlberg aser Williams naprongla represent asür aser parnokia Williams tenüng nung sen $500,000 tenla agütsütsü nangzükogo. Iba lokti ajanga iba ita tetenzüklen kasa fund atema sen million $1 tenla agütsüogo.
Tenla balala agütsüba dak sendakba nung Williams-i Küptoknü ashiba agi, “Asenoki tebendang maliba lima ka aginüra ajaki bendanga agüja inyaktsüla. Tanü ya kü atema anogo tajungtiba rongnung ka lir aser iba ya Mark Wahlberg, WME aser iba inyakyim pusemertem ajanga lir.”