Mark Zuckerberg kinüngtsü tena nem jala ka moatsüogo

Washington, December 12, 2015: Facebook co-founder, arishi küm 31 Mark Zuckerberg aser pa kinüngtsü, Priscilla Chan (30) nati lar jala, Maxima asoba Mongolbar (December 02, 2015) nü sülen tenati company nung tena shares nungi shilem 99 charity asoshi agütsütsü sangdongogo.

Tena jala ya hopta ka tejaklen aso.

Zuckerberg-i pa indang Facebook page nung jala, Maxima dangi shidi ka zülua post asüba nung pai, “Max, onoki na meimer aser na aser tanurtem ajak atema iba lima ya tesem tajungba ka südaktsütsü atema küna khuret tulu lir ta bilemer. Nai küna nem agütsüba ama künati nü akümliji kasa temeim, teimla aser tepela agi sünga lidaktsüner. Nai iba lima asoshi inaktsüdir ibaji reprangtsü künati matateter,” ta shia lir.

Pai lar jala dangi züluba shidi nungsa, “Iba alima nung tanurtem ajak yaritsü atema asenoki asen shilem tilaka inyaktsü. Asenoki asen indang Facebook shares nungi shilem 99 tenlatsü-tang ibaji US sen billion 45 asütsü-ibaji ajanga asen akümli mapang nung alima nung tarusü putu asoshi temelenshi bener arutsürtem den asen-a züngsemtsü,” ta zülua lir.

Taküm July ita nung tenati, tena tanur asotsü imladar ta sangdonga liasü, iba mapang nung Zuckerberg-i public post ajanga küm ana tashi tanur agitsü merangba aser iba mapang nung tanur asemben tashi magitetba (miscarriages) sangdonga liasü.

Zuckerberg aser Chan naprong Harvard nung kaketshir liasü aser kasa reju party ka nung tena ajuru. Iba sülen küm 9 lir tena 2012 küm kibong aküm.