Mars nung tzüto mesükba tsüngsü ka nguteta lir

New York, August 8 (Agencies): Tan Mars nung tzüto mesükba tsüngsü ka ngutetba ajanga iba temeren planet nung litettsüsa tzü angutsü akok, ta bushisüngdangertemi ashi. University of Colorado, Boulder nung aliba bushisüngdangertemi Mars tiyong nung aliba 18-square-mile chloride salt tendanga asadanga liasü. Iba tesem nung metsü aika nungdena aliba ajanga Mars nung tzü aliba kuli angur. “Iba tzüto ya mapang talangka nungi liasüba tzüto ka lir aser onoki iba tesem ya küm kwi tain-ar kanga junga asadangtettsü,” ta University of Colorado, Laboratory for Atmospheric & Space Physics (LASP) nung bushisüngdanger aser iba bushisüngdang nunga author Brian Hynek-i ashi. “Iba tzüto ya tang tashi nung Mars nung anguba tzüto rongnung tulutiba lir,” ta paisa ashi. ‘Digital terrain mapping’ aser ‘mineralogical’ asadangba ajanga ngutetba agi iba tzüto ya küm billion 3.6 dang timbabo masütsü. Planet asadangba scientist temi ashiba agi solar system ya kümteter ano küm billion 4.6 shi ang asütsü. Iba tesem nung metsü alibaji tendangba sülen bushisüngdangertemi ashiba agi, iba metsü ya alima tzüyimtem nung aliba metsü dang nungi noklang nung shilem 8 agi ang takuba aser ibaji ajanga taküm shiruru dak timtem kecha magütsütsü. “Iba metsü ajungba ya ajanga mapa talangka iba tzüto nung taküm shiruru jangratema lir asütsü,” ta Hynek-i shisem. Iba tongutetba ya ‘Geology’ kaket nung adoktsüogo.