Maruti-Suzuki-i premium showroom 100 lapoktsü

Kolkata, August 6 (Agencies): Automobile rongnung kanga nüngtugu, Maruti-Suzuki India Ltd-i, 2016 March ita tashi nung linük nung premium showroom 100 lapoktsü aser ibaji ajanga yimti 30 ayimjemtsü, ta Brishostibar nü metetdaktsüogo.

Tang tashi nung parnok meyong showroom 35 lir koba ajanga yimti 23 ayimjemer. Item showroom tem nem parnoki Nexa ta tenüng agüja lir.

“2016 March ita tashi nungbo linük nung onok meyong Nexa showroom 100 kümer alitsü,” ta Brihostibar nü marketing & sales nung Tatong Tir, Partho Banerjee-i Kolkata nung osangbenertem dang metetdaktsü.

Pai, parnok company meyong gari tasenba, S-Cross, Brihostibar nü Kolkata nung sayaba sülen Nexa showroom tem nung talitsü angutsü, ta ashi.

“Nexa showroom lapokba ya premium aser digital angateta alir customer tejentem dak rangloker lapokerba lir,” ta paisa ashi.

Tang nungibo showroom tem nung salesperson melena relationship manager dang alitsü aser parnok ajanga dang gari ayokba maparen ajak inyaktsü.

“Relationship manager tem nem training agütsüba asoshi onoki sen jenti enokogo aser parnok ajanga customer tem den tesendaktep ayuba nung renlokdaktsütsü,” ta pai ashi.

Banerjee-i ashiba agi, Nexa showroom tem nungi aliba gari tema tang aliba company meyong service centre tem nung servicing sütettsü.

Gari ayokba sülen customer tem gari ki tongtsütsü aser iba mapang oli-aruli jajaba sen company ajanga aotsü.

2020 tashi nung parnoki gari million ana ayoktsü nükjidong lir aser tan S-Cross sayaba ya iba mapatong tetenzükerba lir, ta company ajanga metetdaktsü.