Mary Kom, Lovlina, L Sarita Devi nunger AIBA atema shimogo

Guwahati, Rongjui/September 29 (Agencies): AIBA women’s world boxing championships koba Guwahati nung Yimpoksüi/Nov 15 nungi 24 tashi akatsü ali iba nung India tsür rongnungi nüngtugu boxer MC Mary Kom (48kg)-i anir parnok 10-i shilem agitsü asoshi Rogonü sangdongogo.
Olympic bronze-medallist aser world champion ponguben tashi koker alila Mary Kom-i iba asayamung nung gold medal trokbuba angutsü asoshi merangtsü. Iba asayamung ya 2006 küm akaba sülen India nung taküm mezüngbuba akatsü asoshi renema lir.
Boxer tem rongnung Pinky Jangra (51kg), Manisha (54kg), Sonia (57kg), L Sarita Devi (60kg), Simranjit Kaur (64kg), Lovlina Borgohain (69kg), Saweety Boora (75kg), Bhagyabati Kachari (81kg) aser Seema Poonia (+81kg) nunger densema lir.
Kasa mapang nung Ministry of Tribal Affairs, India-i Mary Kom ya Tribes India brand ambassador asütsü asoshi shimogo.
Mary Kom-i ashiba agi, la Tribes India nung densemba ajanga India nung tribal tem rongsenketsüng nung jenjang tajungba kati ajungketba nung teyari agütsütsü imlar aser BJP sorkari maongka tajung agütsüba tem aser tenüngdakbatem parnok tongtsütsü merangtsü.
Mary Kom, brand ambassador asütsü asoshi sangdongba sentong nung Ministry-isa ‘Punch Tantra’ sentong lapokja liasü koba ajanga India nung tribal products tem ajungkettsü asoshi inyaktsü.