Mashisa aliba mapang tongtibang chiyongtsü kar

Tanur tetsü kati nu bena (mashisa) alidang chiyongtsü tajung achitsüji kanga tongtibang; Na mashisa alibamapang achiba ajakji ajanga nai asotsü aliba tanur ainba ajak nung kongshir. Anungji nai achiba chiyongtsü ajakji tepok nung nai bena aliba tanur asoshi achir ta bilemtsüla.
Mashisa aliba mapang achitsüla tongtipang chiyongtsü kar:

1: Mamatzü aser mamatzü agi yangluba chiyongtsü achitsüla: Mashisa aliba mapang calcium shitak achiba ajanga nü teret aser tepo tashi itdaktsüba den külemi tanur teret nunga kasa teyari agütsütsü. Iba den külemi anogoshia mamatzü marok ka ajemtsüla. Iba dak alia mamatzü agi yangluba cheese, cheese, yoghurt, buttermilk ama achitsüla.
2: Süngolemba aser süngjanglijang achitsüla: Temakrem (green) sentsü aketba aonsotsü aser süngolemba, talisa spinach achiba ajanga folic acid nung yaritsü. Folic acid ya tepok nung aliba tanur asoshi kanga tongtibang lir. Ibaji ajanga tanur tekolok nung yaritsü. Süngolemba chiyongtsü nung tongtibang vitamins, minerals aser calcium densema lir. Ano külen nai kokra anogo nung süngjanglijang tapu pungu achitsüla.Melon, strawberry aser tsükmenatsü ama nung antioxidants lir. Naring nung Vitamin C lir aser metoklashi nung fibre lir.
3: Entsü aser shi achitsüla: Entsü nung protein tajung lir, calorie ajema lir aser omega-3 fatty acids tajung lir, koba ajanga folic acid, choline aser iron tanur teyari angutsü. Entsü kosen-a dena achitsüla, kechiyong iba nungji choline lir. Ano külen shi achiba ajanga tanur cell aser muscle ainba nung yaritsü. Shi toüzük shitak achiba ajanga tanur tetsü anema alitsü.
4: Ango achitsüla: Mashisa aliba mapang ango achiba protein tajung aser omega 3 fatty acids ngua tanur tekolok aser tenük develop asüba nung yaritsü. Hopta nung nai ango anaben achitsüla. Angoji junga mena sor dang achitsüla, kechiyong manen achiba ajanga tanur dak mejungi kongshitsü.
5: Tzü peria ajemtsüla: Mashisa aliba mapang tzü peria ajemba ajanga natzü lenmangtem nung timtem (Urinary tract infections) nungi jenbutsü.