Mashisa alir Colombia tsür 5000 dak tema dak Zika tashidak keta lir

Brazil kübok Recife nung tentetba Altino Ventura rehabilitation center nung micocephaly timtem keter asoba ita 2 tain tanur, Gustavo Henrique physiotherapist kati anepaluba noksa nung angur. (Recife, February 15)

Feb. 15 (Agencies) : Mashisa alir Colombia tsür 5000 dak tema dak Zika virus den sentakba tashidak putetba osang ka Colombia National Health Institute (CNHI)-i metetdaktsüogo.

“Colombia linük nung iba tashidak keta alir nisung 31,555 shi puteta lir aser parnok rong nung mashisa alir tetsür 5,013 shi aliba osang bushitetogo,” ta CNHI-i par Epidemiology Bulletin ajanga metetdaktsü.

Tan osang bushitetba sülen Colombia nung Zika tashidak aketer noklang nung shilem 23 agi timba akümba kuli angur lir.

Tanü tashi nung tashidak aneptsütsüsa mozü mora bushiteta maliba Zika mesen aser microcephaly ta ajaba tebok nung aliba kinü tanur indang tekolak temang den meputepi uludaktsüba aser teloklok mejungi kümdaktsüba timtem na sendaktepa ali asü mali iba kuli tejangja nguteta mali.

Merila ajanga prokshidaktsüba tashidak ya Latin America talisa, Brazil nung tan kanga sashia poktetshia lir.