Masood Azhar nokdangba China-i jangjashitsü

Beijing, Metsüremi/March 30 (Agencies): China-i Hokolbarnü, parnoki Pakistan nung amendaker aliba Jaish-e-Muhammed (JeM) tekolakba Masood Azhar global terrorist ka ama jatsütsü asoshi sota aliba ajanga parnok dang kiralongrar jenokdaktsüba linük ta aitsüba ya tim masü ta shiogo.
US secretary of state Mike Pompeo-i Bodhbarnü China aija ashiba agi, China nungeri par linük nung Muslim nunger million ka dak tema mezüngmeshia amshir saka UN nungbo kiralongrar pusema nokdaker.
Pompeo-isa, iba ya India-i Azhar global terrorist ka kümdaktsütsü asoshi benokba pezübenbuba nokdangtsü temaitsüka lir, ta ashi.
US metetshi, China foreign ministry otongdar Geng Shuang-i ashiba agi, “linük kari China-i ken o sota kiralongrar nem tejenokdak agütsür ta aitsüra, iba tetezüji iba amala mesükba ken o sota ataba linük ajak yagi kiralongrar kümzüka ayur asü? Iba ya shidak ama bilemra linük kobai ken o timba sota ayur parnoki kiralongrar tem timba nem tejenokdak agütsür ta shidi ni?”
“UN Security Council sanctions committee nung ken o technicaly sota ayuba ya inyakyim ka lir, aser ken o timba China-i sota ayur masü,” ta paisa ashi.
China-i ken o sota aliba indang jembidang Geng-i ashiba agi, “iba ken o dak sendaka aliba telok ajak den China maneni sendaktepa lir. Onoki shia aruba ama onoki committee sensaksem nung shilem agitsü atema ken o ajak kanga junga asadangerang shilem agitsü.”
Beijing-i dang ken o nokdaka aliba ajang US-i UNSC dangi meyipogo aser Azhar ya international terrorist ka ama sangdongtsü atema draft ka prokshitsü apitetogo.
Iba dak sendakba nung Beijing-i Brehostibarnü, jenjang balala kümdanga asadanger agitsü shiogo, kechiyong parnoki agiba jenjang ajanga ken o tebenjaba kümdaktsütsü akok.