Masters league atema Libra Legends captain Ganguly shimogo

Kolkata, January 12 (Agencies): Masters Champions League (MCL) asayatsü atema Libra Legends team nung taoba mapang India cricket captain, Sourav Ganguly captain aser team ambassador asütsü Mongulbarnü shimtetogo.
Arishi küm 43 tain, Ganguly ya Sachin indang Cricket All-Stars series nung asaya-a liasü aser ano January 28 nü nungi tenzüka Dubai nung asayatsü aliba MCL nunga asayatsü.
Pai aniba team nung taoba mapang England team nungi off-spinner, Graeme Swann, South Africa nungi Jacques Kallis, Australia nungi fast bowler Shaun Tait aser Brad Hogg nunger dena lir. Legends team nung taoba mapang India team nung fast bowler Abey Kuruvilla coach asütsü.
“Libra legends anitsüba ya kanga akhümket mapa ka lir kechiba süra iba telok nung alima rangbeni kanga nüngtugusüa meteta aliba Kallis, Tait, Swan aser Brad Hogg nunger densema lir,” ta Ganguly-i ashi.
Iba asayamung ya Dubai aser Sharjah nung asayatsü aser team troki shilem agitsü. Iba asayamung indang Final asaya February 13 nü asayatsü.