Matamabensar temeten menokdangtsüla: Dr. Atha Vizol

Mokokchung, December 03 (TYO): Tanü sorkar department aser institution balala nung matamabensar atema yangluba ozüng shitak meinyakba atema temulung kanga shiranga bilemer; Anungji, matamabensar temetenji noktanga mayutsüla, ta State Disability Commissioner (GoN), Dr. Atha Vizol-i Brihostibarnü yangi Mokokchung town hall nung “World Disability Day 2015” state level sentong ka nung jembidang metetdaktsü.
Sorkar department aser institution-temi matamabensartem sadem-sadema oli oratettsü asoshi lenmang, metsümeshidak aser parnok sadema alitsüsa kechisarena junga yanglutsütsü tim ta paisa inyakdaktsünüba olen ka ashi.
India sorkari ‘Disability Act’ (matamabensar ozüng) nung parnok atema mapa agütsütsü maongka teteyuba agüja lir aser item tsüraburtem shirnok sorkar mapa inyaker, parnok asoshia teinyaktsütem shia lir. Aji oda, department-ia iba dak sentakba nung temulung agüja inyakdaki ta paisa metetdaktsü.
Nagaland nung matamabensar (Differently Abled People)-tem asoshi district shia nung medical board tenteta lir. 2014 küm tashi nung iba board ajanga disability certificate 5477 nem agütsüogo. Iba certificate-ji kanga tongtibang kechiyong iba ajanga dang sorkar nungi teyari balala angur. Anungji, shirnoksa iba certificate magizüki lir, agizüktsü asoshi paisa yakta inyaktsüba ka ashi.
Matamabensartem asoshi ‘Inclusive Education’ koba lir, iba nungji tsüraburtem nükmen ser arogo,temulungtet telok, admnistration, hospital, civil societies aser nüburtem ajaki amaliteptsüla ta paisa tayongzükba ka agütsü. “Department kisüngi iba wadang ya makoktsü, anungji, ibai arok khuret asütsüla” ta paisa shisem.
Matamabensar atema medical tsütsü taneptsü mengutsü akok, saka parnok asoshi sarasadem, training balala, nüburtemi nungitba/teyari, kiboksem aser lokti sentong balala nung parnok nem maoangka agüja shilem agidaktsüba maparen inyaktsü lenmang sadema lir ta paisa tebilemba kar lemsatep.
‘Tanü sorkar department aser institution balala nung matamabensar atema yangluba ozüng shitak meinyakba atema temulung kanga shiranga bilemer. Anungji, matamabensar temetenji noktanga mayutsüla. Parnoka tangar ama kasasa shilem agitsü temeten kar’ ta paisa metetdaktsü.
Aikati matamabensar sotetba ya atakatem amai bilemer, ibai tetsü-teboui langka aibelenba mesüra temenen kar ajanga lir ta mashi bilemba ajanga tsüraburtemi aakar. Iba ajanga matamabensartemi parnok lokti nung jentoker ama aser azüngmeyaka bilemer, iyongji parnok tejakleni mouteter. Anungji, “iba mulungsentsüji melenshitsüla” ta paisa ayongzük.
Paisa matamabensar dak sentakba nung teinyaktsü sorkar sentong balala lemsatepa liasü. Matamabensartem asoshi Care & Support Society teloki temulung agüja inyakba asoshia pelaba lemsatep.
Kasa sentong nung tetushi tejaoker Department of Social Welfare (GoN), Director T. Merangtsüngba Aier aser Mokokchung Deputy Commissioner Sushil Kumar Patel IAS natia mapang tatsütsü agia tepela o den tayongzükba o tulu bener arua tesentepertem ayongzük. Assam Rifles HQ 7 Sector akhüm nung 31 Assam Rifles-temi matamabensartem nem wheelchair aser Crutches tenla agütsü.
Iba sentong ya District Election Office Mokokchung, Mokokchung District Blind Association, Mokokchung District Parents Association PwDs & DMA (SSA) den yaritepa department of Social Welfare aser Care & Support Society na lungjemer ayongzük. Matamabensartemi parnok taküm kuli aser sempet balala sayuba ajanga tesenteper peladaktsü.