Matamabensartem atema RS nung Bill ka agizük

New Delhi December 14 (Agencies): Shi aser shisatsü nung tangar memenepertem atema tanü Rajya Sabha nung voice vote ajanga Rights of Persons with Disabilities Bill, 2014 agizükogo, koba ajanga disabilities teratet 7 aliba nungi 19 akumer, iba den külemi lokti kiojen, transport, polling station nung temeten agütsür aser parnok atema national fund tenzüktsür.
Iba bill tasenba ajanga Persons with Disabilities (Equal Opportunities, Protection of Rights and Full Participation) Act, 1995 melener. Bill tasenba ya 2007 küm India-i sign süa aliba United Nations Convention on Rights of Persons with Disabilities den liromedemtsü atema benoka liasü.
Iba ozüng ya 2014 küm February ita nungi Rajya Sabha nung anendaka liasü, ajisüaka Centre nung UPA sorkar kümsük tembangli iba bill ya benoka liasü.
Iba bill benoka Minister of Social Justice & Empowerment, Thawar Chand Gehlot-i, disabled dak sentakba nung menden tazüng atema campaign tenzükogo, ta metetdaktsü.
Paisa, “Iba Bill ajanga shi aser shisatsü nung tangar memenepertem nem ano temeten tali agütsütsü. Parnok nem shilem 3 wazüka yuja aliba nungi onoki shilem 4 kümtsüogo. Kerala nung Divyyang University amenoktsü atema onoki sangdongogo. Iba reju ya taruba küm nungi tenzüktsü,” ta ashi.
Iba bill pusema Congress züngsem, Karan Singh-i, “Iba bill agizükba ajanga asenoki International teinyaktsü ataloktsür dang masü saka asenoki linük sensotem atema tim teinyaktzü inyaker lir. Iba bill ya mapang talangka anendaka liasü aser iba ya ajanga India-i UN tezüngzüktep ataloktsütsü,” ta ashi.
Singh-isa, menden tazüng atema sorkari inyaktsüla aser ajaki matamabensartem akhümtsübua züngshitsü atema nüburtem nem tesayuba agütsütsüla, ta ashi.
Samajwadi Party nungia Naresh Agarawal-i, matamabensartem mezüngmeshi masütsüla aser sorkar mapa atema menden tali lemzüktsütsüla, ta ashi.
Communist Party of India-Marxist lenir, Sitaram Yechury-ia, “Onoki iba bill tashi itshidaktsüner. Parnok atema menden lemzüktsübaji shilem pezü masü saka pongu asütsüla,” ta ashi.
Iba bill ya Lok Sabha nunga agizüktsüla.