Maternity leave ita 6 agütsütsü Bill RS nung agizükogo

New Delhi, August 11 (Agencies): Maternity Benefit (Amendment) Bill, 2016 ajanga tang maternity leave hopta 12 (ita 3) aliba nungi hopta 26 akumtsü benok, aser iba bill ji tanü Rajya Sabha nung agizükogo.
Labour Minister Bandaru Dattatreya-i iba bill benok aser ‘voice vote’ ajanga agizük.
Bodhbarnü Union Cabinet-i tanur ana alir tetsütem maternity leave hopta 12 nungi 26 akumtsü aser tanur ana dak tema alir tetsütem hopta 12 maternity leave agizüka liasü.
Labour Minister-i, “Iba Bill nükjidong ya, mapa inyaker tetsürtem timba akumtsü atema lir, kechiyong mapa inyaker tetsürtem anogoshia tajemba-tajemba akumer,” ta ashi.
Maternity Benefit Act, 1961 ajanga tetsütem tanur asodang aser tanur anepalua pentsüdang mapai mouaka itasen ajunga agütsür. Aser tang yanglushiba bill ajanga nija sector densema sorkar mapa ajak nung maternity leave hopta 26 akumtsü benok.
Iba dak sentakba nung Women & Child Development minister, Maneka Gandhi-ia, tanur sor sülen tetsü ka temang shia arutsü atema mapang agir. Iba ya kanga anibelemba mapang ka aser laji tanur den alitsü nüngdak,” ta ashi.
Women & Child Development Ministry-i maternity leave hopta 12 aliba nungi ita 8 akumtsü benoka liasü, saka magizük.