Mathura rara nung asür nisung 24 jungogo, opposition-i SP sorkar aitsür

Uttar Pradesh, Mathura nung police aser longkak aitertem raradang ali atsünga alir ka yiruba sülen District Hospital-i anir aoba noksa nung angur.

 Mathura, June 03 (Agencies): Brihostibar nikongdang Uttar Pradesh, Mathura nung rara adokba ajanga asür nisung 24 jungogo.

Asür nisung 24 rongnung police ana densema lir aser police 23 shi injang agi yirur hospital nung yaridar.

Brihostibar nikongdang police-i ozüng alema ali rakzüka alirtem meintoktsü merangdang iba raraji adoka liasü.

Iba tatalokba CBI nem bushisüngdangdaktsütsü atema Chief minister, Akhilesh Yadav-i magizük aser pai, police merenemi liasü, ta ashi.

Hokolbarnü osangbenertem den jembidang Yadav-i, “Tashimait kar liasü. Senden amenba sülen police-i kanga junga renemer tenzüktsüla asü. Parnok ket nung prangpong aser injang aika aliba indang osangji police memeteti liasü,” ta ashi.

Pai ashiba agi, Agra Divisional commissioner-i iba tatalokba bushisüngdangdar aser aibelenertem dang tai matoktsü.

Hokolbarnü Centre nung BJP sorkari Yadav’er sorkar nem tai tongloktsüogo. “Uttar Pradesh sorkar tsütsü nungi tashimait liasü,” ta minister of State Home, Kiren Rijiju-i ashi.

BJP-i, police ketdangser ana tepsetertemji sorkar tashi nung aliba party, Samajwadi Party (SP)-i kümzüka ayur, aser iba tatalokba ajanga state nung tzüzüng ozüng maliba sayur, ta ashi.

Ano Bahujan Samaj Party aser Congress densema state nung opposition party temia Yadav’er sorkar nem tai tongloktsüogo.

Congress lenir, Rahul Gandhi-i, iba tatalokba ajanga UP nung tzüzüng ozüng tensa tamajungba akumba sayur ta ashi.

BSP tongti, Mayawati-ia, SP sorkari anentsüla aser iba tatalokba atema khuret agitsüla ta ashi. Laisa mapang telatet ka nung judicial-i bushisüngdangtsü khangogo.

Ano police tsütsülen nungi UP Director General of Police (DGP), Javed Ahmed-i, asür nisung 24 nungi nisung 22 bo rara adokdaktsürtem lir, ta ashi.

Paisa, police-i temzüng alema ali rakzüka alirtem meintoktsü aodang ali atsünga alirtem jagi injang maneni yokba den long aser ajok agi police amak, ta ashi.

“Ki ana azüngtettsüba sülen longkak aitertemi gas cylinders aser injang rizüngba kidang mi senoktsüba ajanga tapoktsü jenti apok,” ta DGP-isa ashi.

“Iba tesem nungjagi onoki prangpong 47, rifles 6 aser hand grenade 178 ngutetogo. Tang tashi nung rongrong adokdaktsür nisung 124 puogo. Iba den külemi tetsür 16 densema nisung 196 puogo,” ta police ketdangserisa metetdaktsü.

“Aibelener tongtitem aser iba telok nung lenirtemji Ram Vriksh Yadav, Chandan Bose, Girish Yadav aser Rakesh Gupta nunger lir aser parnok taküm lira police-i aputsü,” ta paisa ashi.

Iba tensa asadangtsü aser judicial nem bushisüngdangdaktsütsü atema BJP National Tir, Amit Shah-i national secy., Shrikant Sharma rara adokba tesem jagi yok.

Sharma-i, lokti azüoktettsüsa police renema maliasü, ta ashi.

Ali atsüngertemi Samajwadi Party den tesentaktep aliba ajanga ketdangsertemi police dang tetuyuba kar liasü, ta pai tai tongloktsüogo.

Sharma-isa, “Item ozüng alema inyakertem ajanga sorkar tashi nung aliba party-i mezüng ali acre 280 dak tema rakzükdaktsü. Iba ken o nung tongti sentong yanglusangji Samajwadi Party-i kümzüka ayur. Iba tesem jagi police temji teka alener yok (teinyaktsü meinyak), aser ibaji ajanga parnok (police) ana asü,” ta ashi.