Mathura raraba ken o nung police-i tongti aibelensang puogo

Mathura, June 15 (Agencies): Tawa Mathura nung rara adokba ken o nung tongti aibelensang Uttar Pradesh Police-i puogo.

June 2, 2016 nü rara nung nisung 29 asü aser iba ken o nung Chandan Bose aser pa kinüngtsü na Parsurampur tesem kübok yimtsüng ka nung police-i apu.

“Ram Vriksh Yadav, Chandan Bose, Girish Yadav aser Rakesh Gupta nungeri iba rara adokdaktsü, iba mapang nung police-a ana asü,” ta Uttar Pradesh Police additional director general (law and order), Daljeet Singh-i ashi.

Court ka tetuyuba kübok iba anogo nung police-i ali rakzüka alir nisung 2,000 shi mintoktsü merangdang iba rara adoka liasü.

June 3 nü Uttar Pradesh sorkari Centre nem agütsüba osang nung, “Mezüngbuba telokji June 2 nü iba tensa reprangdanga nisungtemji mintoktsü atema sentong yanglutsü asoshi yoka liasü. Iba mapang nung parnok dak gas cylinder aser lung tulu agi aon,” ta shia lir.

Iba tatalokba sülen tensa reprangdangtsü aser judicial nem bushisüngdangdaktsütsü atema BJP National Tir, Amit Shah-i national secretary, Shrikant Sharma rara adokba tesem jagi yoka liasü.

Iba dak sentakba nung Sharma-i, lokti azüoktettsüsa police renema maliasü, ta ashi.

Ozüng alema ali rakzüka alirtemji Samajwadi Party den tesentaktep aliba ajanga ketdangsertemi police dang tetuyuba kar liasü, ta state sorkar nem tai tonglokja liasü.