Matt Reeves-i Batman movie direct asütsü akok

February 11, 2017(Agencies): Ben Affleck-i taruba Batman solo movie pai direct masütsü ta taoba hopta sangdongogo.
Osang ka ajanga ashiba agi, iba shilem Planet of the Apes director Matt Reeves-i agitsü akok. Iba film tang teyanglushidak lir, aser maneni iba film direct asütsü asoshi Ridley Scott aser Fede Alvarez nungera züngshidar, ta osang ajanga shisem.
J.J. Abrams den külemi TV series ‘Felicity’ yangluba sülen Reeves nübortemi meteta aküm. Iba sülen pai ‘Cloverfield’ movie direct asü. Rise of the Planet of the Apes, Dawn of the Planet of the Apes aser Planet of apes film tamenbuba War for the Planet of the Apes film tem pai direct asü..
Batman film original otsü koba Affleck aser Geoff Johns nati zülu iba ya Chris Terrio-i zülushi. Maneni iba otsü nung shilem kar yanglushitsü mesüra ajunga melentsü, ta osang ka ajanga metetdaktsü.
Yaküm Batman solo movie ya Affleck-i direct süa pai tongti shilem agitsü ta jembia aru, saka taoba hopta pa director asütsüba mapa toktsüogo. Mapa anaprongla külemi inyaktsüji kanga tasak lir, ta pai ashi.
“Film tem nung shilem karbo nebur million aika atema tongtipang lir. Yamala shilemtem nung kü dak akaba tajungtiba agi shilem agitsü asoshi kanga nendaka inyaktsüla, aser mapa ana külemi areper inyakra iba ya mataloktsü.”
“Studio den külemi iba film atema director ka bushitsü lemtetogo. Ni maneni iba film asoshi bendanga agüja lir, aser alima ajunga nung onok sapurtem atema iba film mapa küma inyaktsü yongya atar,” ta Affleck-i ashi.