Mauricio Macri-i Argentina Tir inyaktsü tenangzükba agiogo

Buenos Aires, December 11 (Agencies): Mauricio Macri-i Argentina Tir tasenba inyaktsü tenangzükba yashi Brehostibar nü Buenos Aires yimti nung agiogo.

Taoba mapang Buenos Aires yimti Mayor alisang, Macri-i taoba Tir, Cristina Fernandez melenzüka linük Tir tasenba akümba ajanga Fernandez-i yutsüba rongsenren jenjang mejungi aliba densema khuret jenti benoker lir.

Yashi tenangzükba agiba sentong nung Argentina yimsüsürtem, Latin America nung densemba linük lenirtem aser taoba Spain chuba, Juan Carlos I densema, tongti nisung aikati shilem agia liasü.

Ajisüaka, Fernandez-ibo yashi sentong nung shilem magi süidaktsüba osang jangjaogo.

Marci-i tan linük Tir menden benokba sülen pa küm 14 tsüngda nung Peronist yimtenren telok nung mezüngsemer Tir mezüngbuba akümer lir.

“Argentina nung sensakba tia ageintsü, ozüng alema mozü mora shibelenbaren samatsütsü aser yimtenren telok rong nung adokba tebendangbaren agiena linük ajunga ka küma lungemtsütsü nangzüker,” ta Marci-i Tir menden benokba sülen metetdaktsü.

Ajisüaka, komala tasa amshia item alizüngtemji asangsang nung ajangzüktsütsü iba osangbo pai memetetdaktsü.

Tesülen, Macri aser par kibong korgari nung anir Casa Rosada presidential palace tonga aoba sülen idakji Tir menden benoktsü den tatembang sentong agia, Macri nem Tir ajok amoktsü.

“Ni asen Argentina linük aser Argentina nübur ajunga kanga meimer. Asenoki külemi lunjemer asen Argentina linük tia temaba jenjang nung ajungkettsü,” ta Macri-i tesülen nüburtem den ajurutepdang sangoktsü.